Kryeministri i Shqipërisë, Edi Rama, ka mberritur në Paris ku pritet të marrë pjesë në Samitin e Koalicionit të Vullnetmirëve për Ukrainën, me ftesë të presidentit francez Emmanuel Macron. Gjatë qëndrimit në kryeqytetin francez, Rama ka zhvilluar takime me Macron dhe liderë të tjerë të vendeve pjesëmarrëse në këtë samit, ndërsa ka publikuar edhe momente nga aktivitetet në prag të Paradës së Madhe Ushtarake të 14 korrikut në Francë.
Pjesëmarrja e kryeministrit shqiptar në këtë takim vjen në kuadër të mbështetjes së vazhdueshme të Shqipërisë ndaj Ukrainës dhe qëndrimit të saj në favor të respektimit të sovranitetit dhe integritetit territorial të këtij vendi. Sipas Agjencisë për Mediat dhe Informimin, Rama do të jetë gjithashtu i pranishëm më 14 korrik në ceremoninë zyrtare të Festës Kombëtare të Francës, sërish me ftesë të presidentit Macron.
Kjo është vizita e dytë e Ramës në Paris brenda një muaji. Më herët, më 22 qershor, ai zhvilloi një takim dypalësh në Pallatin Élysée me presidentin francez, ku në fokus ishin procesi i integrimit europian të Shqipërisë, bashkëpunimi në energji, mjedis dhe investimet franceze në vend. Pas përfundimit të vizitës në Francë, kryeministri Rama pritet të udhëtojë drejt Brukselit, ku do të marrë pjesë në Konferencën Ndërqeveritare Shqipëri-Bashkimi Europian për vijimin e procesit të negociatave dhe hapjen e kapitujve të rinj të integrimit.
gijotina.com/
Discussion about this post