Kryeministrja e Serbisë, Ana Bërnabiç ka reaguar për vizitën e këshilltarit të lartë në Departamentin Amerikan të Shtetit, Derek Chollet duke u shprehur se nuk ka pritje as të mira as të këqija.
Bërnabiç ka thënë se i vetmi “premtim i rëndësishëm” nga SHBA-ja ka të bëjë me Asociacionin e komunave me shumicë serbe.
“E vetmja gjë që mendoj se është e rëndësishme dhe është në tavolinë është premtimi i Shteteve të Bashkuara të Amerikës se formimi i Asociacionit të komunave serbe do të nisë në janar. Kjo do të ishte shumë mirë, që do të ishte zbatim i Marrëveshjes së Brukselit”, tha Bërnabiç për “TV Pink”.
Sipas “Danas”, Bërnabiç ka shpërndarë edhe një postim në Twitter të Ministrisë së Jashtme të Gjermanisë ku thuhet se “plani i dy gjermanive nuk është zgjidhje për Qipron por, proces që duhet të kalojë nëpërmjet Organizatës së Kombeve të Bashkuara dhe në përputhje me rezolutat e OKB-së”.
“Dhe kur shihni Serbinë, është vetëm një alternativë dhe nuk është zgjidhje nën kujdes të OKB-së dhe respektim të rezolutës së OKB-së. Ky është realiteti dhe ne duhet të punojmë në ato korniza dhe t’i mbrojmë interesat e Serbisë”, ka theksuar Bërnabiç.
Më tej kryeministrja serbe ka deklaruar se ka marrë garanci nga presidenti i Interpolit, Ahmed Nasser Al-Raissi, me të cilin ka biseduar në Dubai, se gjatë mandatit të tij do të përpiqet të “mos e politizojë” organizatën. Sipas Bërnabiç, kjo nënkupton se s’do të ketë anëtarësim të Kosovës në Interpol.
Discussion about this post