Kryeministri i Malit të Zi, Dritan Abazoviç ka folur për mediat nga Kievi, ku së bashku me kryeministrin e Shqipërisë Edi Rama po zhvillojnë një vizitë zyrtare me ftesë të presidentit ukrainas Volodymyr Zelensky.
Ata mbërritën në orët e para të mëngjesit dhe kanë vizituar disa prej qytezave të shkatërruara nga lufta si Borodjanka dhe Irpini, por mes tyre edhe Bucha-n, ku dhjetëra civilë u gjetën të masakruar dhe të lidhur nga forcat ruse.
“Të gjithë po vlerësojnë shumë përpjekjet e Malit të Zi dhe vendeve të tjera të rajonit për të treguar solidaritet me popullin ukrainas. Ne jemi për gjetjen e një zgjidhjeje në dialog, por gjëja më e rëndësishme është ndalimi i aktiviteteve të luftës, agresionit dhe vrasjes së civilëve”, tha kryeministri malazez.
Abazovic gjithashtu tha se ata patën mundësinë të vizitojnë qytetet e shkatërruara nga lufta dhe të dëshmojnë një katastrofë të madhe humanitare.
“Është tragjike ajo çka pamë dhe dëgjuam. Infrastruktura e shkatërruar dhe përfundimi është i thjeshtë – duhet të jemi krenarë për qytetarët e Malit të Zi që zgjodhën paqen. Paqja nuk ka çmim, paqja është gjithçka që na nevojitet. Pavarësisht nga të gjitha dilemat dhe dyshimet që ne kemi në shoqëri, gjëja më e rëndësishme është të jetojmë në paqe, ky është supozimi më i rëndësishëm i çdo gjëje”, tha ai më tej.
Discussion about this post