Vijojnë tenderët me një konkurrent në Bashkinë e Tiranës. Kësaj radhe bëhet fjalë për dy tenderë që ka zhvilluar nëpërmjet Agjencisë së Shërbimeve Funerale. Në datën 8 shkurt 2022 është hapur procedura për blerje bordurash provizore varri. Kjo procedurë mban numrin e referencës REF-18816-02-07-2022 dhe ka fondin limit prej 11.375.000 lekë të reja, ose rreth 114 milionë lekë të vjetra. Në këtë tender ka marrë pjesë në garë vetëm një kompani, “SHPRESA-AL” sh.p.k e cila pa pasur asnjë konkurrent është shpallur fituese. Pra, procedura është bërë pa respektuar parimin e garës.
Por avazi i Bashkisë që drejtohet nga Erion Veliaj nuk mbaron këtu. Në po të njëjtën ditë, pra në 8 shkurt 2022 Agjencia e Shërbimeve Funerale ka hapur tenderin e dytë, për blerje veshjesh nëntoksore varri. Kjo procedurë mban numrin e referencës REF-18814-02-07-2022 dhe ka fondin limit prej 23.910.990 lekë të reja, ose rreth 240 milionë lekë të vjetra. Njësoj si në tenderin e parë, edhe në këtë tender ka marrë pjesë në garë vetëm një konkurrent, “SINDER AB” sh.p.k i cili është shpallur fitues duke mos pasur asnjë konkurrent tjetër.
Këto tenderë janë futur në kategorinë e flamurit të kuq nga “Open Data” me mbishkrimin e mungesës së konkurrencës. Tenderët pa konkurrencë ngrenë dyshime se fituesi mund të jetë i paracaktuar. Edhe metoda që ka përdor Bashkia e Tiranës, e cila edhe pse institucioni prokurues është i njëjtë dhe blerjet që do bëjë janë për të njëjtin qëllim, nuk i ka bërë bashkë, por i ka ndarë në dy procedura.
Siç duket Lali Eri nuk ka dashur që t’i bëjë bashkë dy kompanitë fituese, pasi nëse do ishin bashkë në garë do të dilte vetëm njëra fituese. Për këtë ai ka menduar që të bëjë dy tender të ndryshëm me vlera stratosferike dhe kështu i ka respektuar të dy kompanitë e miqve të tij, me ca taksa të qytetarëve. Bashkia e Tiranës është kampionia në bërjen e tenderëve pa garë, por që nuk është vënë re asnjëherë nga autoriteti i konkurrencës.
Gijotina.com
Discussion about this post