Një tjetër tender i dyshimtë është regjistruar së fundmi nga kompania shtetërore e sigurisë “Illyrian Guard” Sh.A, ku fitues është shpallur sërish një emër i njohur për përfitimin e tenderëve publikë: Nertil Lilo me kompaninë e tij “Integrated Smart Solutions” (I.S.S).
Objekti i këtij tenderi është “Sisteme Vëzhgimi” për nevojat e vetë “Illyrian Guard”. Procedura është cilësuar si “e hapur”, me numër reference REF-51454-06-17-2025 dhe fond limit prej 14,366,491 lekësh të reja pa TVSH, që përkthehet në rreth 172 milionë lekë të vjetra me TVSH.
Tenderi është zhvilluar në kushte të dyshimta, pasi në të kanë marrë pjesë vetëm dy kompani, ku njëra prej tyre ka ofruar zero lekë. Si rrjedhojë, kompania e vetme që dha ofertë reale — I.S.S e Nertil Lilos — është shpallur automatikisht fituese me vlerën 14,051,460 lekë të reja pa TVSH, ose rreth 168 milionë lekë të vjetra me TVSH.
Kjo shumë përfaqëson 97.8% të fondit limit, duke ngritur dyshime serioze për mungesë gare dhe favorizim.
Nertil Lilo dhe kompania e tij janë përfshirë në mënyrë të përsëritur në tenderë të ngjashëm nga institucione publike, shpesh në rrethana që ngjallin dyshime për paracaktim të fituesit dhe mungesë transparence.
Ky rast i radhës hedh dritë mbi mënyrën se si fondet publike vijojnë të shpërndahen përmes procedurave të dyshimta, ku konkurrenca është thjesht një formalitet, ndërsa fituesit dihen që në fillim.
/joq/
Discussion about this post