Pluhuri afrikan pritet të rikthehet në vend këtë fundjavë.
Vendi ynë do të ndikohet nga kushte të qëndrueshme atmosferike për shkak të masave ajrore të ngrohta me origjinë jugore si pasojë e depërtimit të pazakontë për periudhën që ndodhemi të Anticiklonit Afrikan.
Moti parashikohet i kthjellët në të gjithë territorin e vranësira të pakta kalimtare kryesisht të larta dhe transparente. Vlen për tu theksuar se temperaturat në vlerat e mesditës pritet të kapin vlera deri në 30 gradë celcius, vlera këto anormale dhe rreth 7-8 gradë më të larta se mesatarja klimatike mujore për vendin tonë.
Gjithashtu duke nisur nga dita e Diel pritet afrimi gradual nga Europa perëndimore e një qendre të thellë të presionit të ulët e cila duke kaluar mbi Afrikën e Veriut do të transportojë mbi Europën kryesisht juglindore sasi të larta të pluhurit (me origjinë nga rëra e shkretëtirës së Saharasë).
Sipas Shërbimit Meteorologjik Ushtarak, kombinuar më temperaturat e larta, kjo situatë do të krijojë ndjesinë e ajrit “mbytës”, ndonëse kjo situatë është përsëritur shpesh herë edhe në të kaluarën mbi vendin dhe nuk është një fenomen i ri.
E njëjta situatë ishte prezente disa ditë më parë në vend. Mjekët ndërkohë, bëjnë apel për kujdes të shtuar te personat vulnerabël.
Mjeku Ilir Alimehmeti, tha në një emision televiziv se ky fenomen është problem për ata që vuajnë nga zemra dhe nga astma.
Mjekja alergologe Alkerta Ibranji tha se pluhuri saharian që mbuloi Shqipërinë ka rënduar gjendjen shëndetësore tek pacientët alergjike dhe asmatikë, por dhe ata me sëmundje të tjera kronike, me probleme kardiake apo të mushkërive.
Lexo edhe:
Mjekët: Pluhuri saharian rëndoi alergjikët dhe asmatikët
Discussion about this post