Bën Lali Eri mashtrime me “Pyllin Orbital” në Tiranë, e kopjon edhe kryetarja e Bashkisë Durrës, Emiriana Sako. I jep miliona Euro Pjetër Trashajt bashkia Tiranë, vrapon edhe Emiriana Sako të kapë të njëjtën kompani. Gjithçka ndodh pas fasadës që mbulon tenderat fiktivë për pemët dhe shkurret dekorative.
Kështu, çdo vit në Durrës shpenzohen qindra miliona lekë për të mbjellë pemë. Në të kundërt, qyteti vazhdon të mbetet në një nga qytet më të betonizuar dhe temperaturat djegin qytetin si në asnjë qytet tjetër të Ballkanit.
Kjo ndodh për shkak se kryetarja një vit i mbjell dhe vitin tjetër i shkul pemët. Kështu ka bërë përmes tenderit që do të raportojmë sot, i cili ka si objekt ‘Gjelbërim në qytet’, i cili kushton 161 milionë lekë. Gara për tenderin është mbyllur në 18 mars 2024 dhe më 2 maj 2024 është bërë publik emri i fituesit që është “ALBGARDEN” SHPK.
Për këtë tender në fillim janë paraqitur dy oferta, por propozimi i firmës LEON KONSTRUKSION Shpk, edhe pse duket më ekonomik, nuk u mor parasysh, sepse kjo firmë u skualifikua që në fazën e parë. Për në finale mbeti vetëm zarfi me ofertën e ALBGARDEN SHPK në pronësi të Pjetër Trashajt. Pasi ishte eliminuar konkurrenca, kjo firmë mori kontratën e kryetares Sako.
Tenderi përfundoi jo vetëm pa garë, por edhe me pranimin e ofertës sa 99% e fondit limit. Sako e mbajti disa kohë në sirtar kontratën dhe tashmë është e publikuar në Agjencinë e Prokurimeve
Për këto shkelje portali monitorues ‘Open Data Albania’ i ka vendosur “Flamur të kuq” tenderit, që është shenja e riskut të korrupsionit.
Mbillen të njëjtat pemë çdo vit
Ndërkohë sikur përmendëm pak më lartë, sipërfaqja e gjelbëruar nuk rritet sepse kryetarja Sako vetëm zëvendëson pemët ekzistuese.
Në tabelën më poshtë thuhet se do të bëhen gërmime, dhe do të shkulen pemët dekorative ekzistuese, sepse do të mbillen të reja, prandaj edhe do të shpenzohen aq shumë para.
Po pse i shkul Sako këto pemë që janë mbjellë një vit më parë? Kujtojmë se kryebashkiakja e Durrësit ia fali tenderin 290 milionë lekë “ALB Garden” në 1 maj të vitit 2023.
Po e risjellim për lexuesit dokumentin më poshtë, ku tregohet tenderi me “Flamur të kuq”, që Eimiriano Sako i ka dhënë një vit më parë kësaj kompanie.
Ku janë pishat e mbjella në Lurë?
Nga ana tjetër, biznesmeni Pjetër Trashaj është i evidentuar herët për marrjen e tenderave me abuzime dhe shkeljen e kontratave. Në vitin 2014, Trashaj kishte futur të birin në administratën e ministrit të Mjedisit, Lefter Koka. Në kuadër të projektit për ripyllëzimin e Lurës, kryetari i komisionit të tenderave për pyllëzimet në Ministrinë e Mjedisit, Ender Trashaj, ia dha kontratën të atit, që ishte administrator i kompanisë “Alb-garden”. Kompania duhej të mbillte sipas angazhimit 45 862 copë fidanë, kryesisht pisha. Situata në terren nxjerr se vetëm një sasi e vogël janë mbjellë, madje dhe një pjesë e tyre janë tharë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post