Dalja e lumit Vjosa nga shtrati ka shkaktuar problematika në disa fshatra duke sjellë përmbytje dhe probleme me qarkullimin. Banorët e Fierit u shprehën për mediat se ndihen të rrezikuar dhe të zhgënjyer nga qeveria.
Ata thonë se situata është shumë e përkeqësuar ndërsa shtojnë se nuk është marrë asnjë masë.
“Është shumë rrezik, përmbytja po vjen nga tëra anët. Ne u gënjyem nga qeveria se na tha janë marrë të gjitha masat. Është blinduar Vjosa, është blloku argjinatura. Nuk na lajmëroi njeri të merrnim masa. Do mbytemi kështu përfundimisht. Edhe dëmshpërblimet janë selektive. Unë akoma s’kam marrë dëmshpërblimin e radhës parë. Si është gjendja kësaj radhe edhe ne do përmbytemi. Flitet që dalë një ujë shumë i madh në Fushë. Erdhi një sasi e madhe uji që ishte e paparashikuar. Uji ka vajtur deri në 1 metër. Këtë radhë s’ka ardhur asnjëri. Gruan e çova te një komshi që është në kat të dytë, vetë po rri këtej”, tha një nga banorët.
Një tjetër segment rrugor që është bërë i pakalueshëm si pasojë e bllokimit nga uji është rruga e vjetër Vlorë-Fier. Ndërkohë Lumi Vjosa ka sjellë dhe dëmtimin e disa urave duke izoluar banorë të zonave të ndryshme.
Discussion about this post