Vatrat e zjarreve janë rikthyer në vendin tonë fuqishëm, duke krijuar situata të vështira në shumë zona të vendit. Situata më problematike paraqitet në Vlorë, ku zjarrfikësit janë në “luftë” me flakët, madje qytetarët janë përplasur me kryebashkiakun Leli, i cili ka shkuar për të inspektuar ndërhyrjet nga afër. Por ndërsa Vlora digjet, kreu i bashkisë Tiranë është ndjerë jashtë vëmendjes këto ditë, ku i ka munguar protagonizmi.
Në këto kushte, ndërsa zjarret në Vlorë shkaktojnë dëme të konsiderueshme, ai ka zgjedhur të bëjë shoë me dy mjete zjarrfikëse të reja në repartin zjarrfikës të Tiranës. Kjo duket se ka qenë mënyra e tij për të propaganduar investimet te zjarrfikësit, duke tentuar të mbulojë lumin e ankesave të bëra nga punonjësit e këtij shërbimi.
Vlen të kujtohen ankesat e shumta që janë bërë prej një muaji nga sindikata e zjarrfikësve për numrin e ulët të punonjësve, rritjen e pagave apo amortizimin e mjeteve të punës. Madje, Veliaj u krenua me faktin se “Shqipëria ka pasur më pak zjarre se në vitin 2015”, por harroi faktin se vatrat e zjarrit këtë vit shkaktuan dy viktima në Gjirokastër.
Megjithatë, këta skenarë propagandistë duket se nuk i shërbejnë publikut, por as ruajtjes së pasurive kombëtare, ku në vend që të bëheshin ceremoni dhurimi, ato zjarrfikëse duhet të çoheshin atje ku është më e nevojshme ndërhyrja për shuarjen e flakëve.
