Tenderi i firmosur nga Dritan Leli për pastrimin e njësive në periferi të Vlorës, mbahet peng nga kryebashkiaku i ri Ermal Dredha. Bëhet fjalë për prokurimin me objekt “Shërbimi i pastrimit të njësive administrative Novoselë, Qendër Vlorë dhe Shushicë për vitin 2023”. Përveçse se janë në lojë 314 milionë lekë nga buxheti i taksapaguesve vlonjatë, po mbetet pa u pastruar një pjesë e rëndësishme e Bashkisë Vlorë, pikërisht në mes të sezonit turistik.
Në datën 2 maj 2023 është publikuar në Sistemin e Prokurimeve Elektronike procedura e prokurimit “Procedurë e hapur”, me Nr. REF-67721-04-28-2023. me fond limit 31,467,958 lekë (pa TVSH), zhvilluar në datën 31 maj 2023 nga autoriteti kontraktor, Bashkia Vlorë.
Kuptohet se, organizimi dhe firmosja e urdhrit për tenderin nga Leli është një nga arsyet që ka çuar në bllokimin e tenderit.
Ish-kryetari në largim ka firmosur preventivin, autorizimin e prokurimit të këtij shërbimi dhe ndoshta ka pasur ndikim edhe në kriteret e kualifikimit. Me pak fjalë, Dredha nuk mund të lejonte që këtë fond të madh ta fitojë dikush që e ka ndihmuar Leli.
Menjëherë kanë reaguar palë e interesit më këtë tender, që janë kompanitë e pakënaqura me vendimin e Dredhës që anuloi tenderin.
Pasi operatorët kishin dorëzuar ofertat e tyre, Kryetari i Bashkisë Vlorë, i zgjedhur më 14 maj 2023, Ermal Dredha e ka anuluar procedurën më datë 8 qershor 2023, me argumentimin se nuk ka mbërritur asnjë ofertë e përshtatshme. Por, kjo gjë nuk i ka pëlqyer aspak biznesmenit Luan Kapri, i cili është mësuar të rrëmbejë çdo tender që ka si objekt pastrimin, qoftë me hir apo me “pahir”.
I vendosur ta bëjë rrëmujë, Kapri ka çuar ankimim në KPP, madje me dy firmat e tij “Rej shpk” dhe “Rej energy”.
Sipas tij, i gjithë tenderi kishte shumë gabime dhe kritere diskriminuese. Pra, kundërshtohet anulimi që bëri Dredha!
“Është konstatuar se dokumentet e tenderit përmbajnë gabime ose mangësi të rëndësishme dhe për shkak të rrethanave të paparashikueshme dhe objektive, nevojat ose aftësia paguese e autoritetit ose entit kontraktor kanë ndryshuar”, thuhet në ankesën e Kaprit.
Më tutje ai shton se duke shkelur afatet, Bashkia ka hapur një procedurë të re, në të cilën ai nuk ka mundur të dorëzojë një ofertë, sepse ka pasur ndryshime. Për këtë rast ai ka bërë një tjetër ankesë me firmën tjetër “Rej energy”.
“Në ankesë, ofertuesi ekonomik është shprehur se pa mbaruar afatet e ankimimit ka hedhur sërish procedurë të re. Arsyeja e hedhjes ka qenë se AK nuk ka bërë vlerësim të hapave, duke e parë qartazi dhe në imazhe që dorëzimi i ofertave ekonomike rezulton të jetë me top të kuq, gjë që tregon dhe pasqyron qartazi veprimet e autoritetit kontraktor”, thuhet në vendim.
Duke vënë në lojë firmat e tij dhe duke bërë kaq shumë ankesa, KPP i ka hapur rrugën Kaprit, duke pranuar ankesën.
Njëkohësisht me Luan Kaprin, në KPP kishte shkuar edhe denoncimi i Eriola Likajt, pronare e kompanisë “Clean Fast” SHPK. Edhe Likaj ka kundërshtuar kriteret e reja të tenderit që ka hartuar Dredha në “rishpalljen e anuluar”.
Kështu, Komisioni i ka kërkuar Bashkisë Vlorë të marrë në konsideratë kërkesat e tyre. Dhe si pasojë vazhdon loja për paratë, por puna për pastrimin nuk ka nisur ende. Dredha nuk do t’ia dijë që Vlora është në mes të sezonit turistik, por vazhdon luftën me Lelin, për të kapur ç’a të mundet nga tenderët e lënë përgjysmë nga paraardhësi! Lexo edhe: Ermal Dredha i jep 345 milionë lekë mikut të Dritan Lelit, tenderi pa garë për blerje nafte
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post