Protesta e studentëve dhe gjimnazistëve po zgjerohet edhe në qytete të tjera të vendit. Pas Tiranës, Durrësit, Elbasanit, Korçës dhe Shkodrës, edhe studentët e Vlorës kanë nisur një marshim në mbështetje të protestës që po zhvillohet në kryeqytet.
Një grup studentësh kanë dalë nga ambientet e Fakultetit të Shkencave Humane dhe janë nisur përgjatë bulevardit të Vlorës, duke u bërë thirrje studentëve të tjerë që t’i bashkohen tubimit.
“Bashkohuni me ne”, është një prej thirrjeve që të rinjtë po përsërisin gjatë marshimit, me synimin për të rritur pjesëmarrjen në protestë.
Sipas informacioneve të deritanishme, marshimi po zhvillohet në mënyrë paqësore dhe nuk raportohen incidente. Studentët pritet të vijojnë lëvizjen drejt Rektoratit Qendror të Universitetit të Vlorës, ku është parashikuar edhe mbërritja e marshimit.
Ndërkohë, kujtojmë se protesta e studentëve dhe gjimnazistëve në Tiranë ka hyrë në ditën e tretë, ndërsa mobilizimi është shtrirë edhe në Durrës, Elbasan, Korçë dhe Shkodër.
Edxhe nxënësit e gjimnazit “Shote Galica” në Fushë-Krujë dolën këtë të enjte në protestë, duke bllokuar për disa minuta rrugën kryesore të qytetit.
Gjatë protestës, ndërsa kërkuan dorëheqjen e kryeministrit Edi Rama, ata shpërthyen kapsolla dhe ndezën tymuese.
Në kryeqytet, të rinjtë kanë bojkotuar mësimin dhe janë grumbulluar pranë institucioneve, përfshirë Ministrinë e Arsimit dhe Kuvendin.
Përfshirja e studentëve të Vlorës shënon zgjerimin e mëtejshëm të protestave, ndërsa mbetet për t’u parë si do të vijojnë tubimet gjatë ditës.
Discussion about this post