Një armë zjarri dhe fishekë janë sekuestruar nga policia e Vlorës. Sipas bluve, arma e zjarrit ishte e fshehur nga një fëmijë 14 vjeç.
Rasti, siç bëri me dije kreu i Drejtorisë Vendore të Policisë Vlorë, Elidon Çela gjatë një konference për mediat këtë të premte, u zbulua pas marrjes së informacioneve nga policia nga komunikime me stafet pedagogjike dhe prindër.
“Dua t’ju bëj me dije, gjatë dy javëve të fundit, dhjetëra prindër dhe pjesëtarë të stafeve pedagogjike të qarkut Vlorë kanë kontaktuar Policinë, duke ndarë shqetësime dhe informacione mbi aktivitetet dhe sigurinë e fëmijëve të tyre, kryesisht të moshave 12 deri në 18 vjeç. Këto informacione kanë qenë të vlefshme dhe kanë ndihmuar në orientimin e veprimeve tona parandaluese.
Një shembull konkret është rasti i një 14-vjeçari, ku, falë informacionit të siguruar dhe punës profesionale nga Policia e Vlorës, ditën e djeshme është bërë e mundur që, nëpërmjet një fotografie të gjetur në celularin e tij dhe pas një pune profesionale me psikolog, prind dhe punonjës social, të gjendej e fshehur në një motomjet pranë një banese një armë zjarri pistoletë me rreth 130 copë fishekë luftarakë, të cilat i kishte fshehur ky 14-vjeçar. Nga ana jonë vijon puna intensive për të identifikuar personin që ia ka dhënë armën këtij 14-vjeçari, i cili u arrestua për armëmbajtje pa leje”, tha Çela.
Më tej, ai u bëri apel qytetarëve të denoncojnë paligjshmërinë.
“Përfitoj nga rasti që t’i falënderoj të gjithë prindërit dhe stafet pedagogjike që kanë ndarë shqetësimet dhe informacionet e tyre me Policinë. Kontributi i tyre është një shembull i rëndësishëm i bashkëpunimit për rritjen e sigurisë së fëmijëve në rrugë dhe shkollë. Ftoj të gjithë qytetarët që të vazhdojnë këtë bashkëpunim, duke denoncuar rastet e paligjshmërisë, me garancinë e anonimatit të plotë dhe një reagim të menjëhershëm e profesional nga strukturat e Policisë së Qarkut Vlorë”, shtoi.
Lexo edhe:
14-vjeçari në Vlorë u kap armë, babai i të miturit: E gjetën në një godinë të braktisur
Discussion about this post