Rastet e dhunës në familje janë shtuar përgjatë pandemisë, kështu bëjnë me dije statistikat në qytetin e Vlorës. Sipas informacioneve, denoncimet për dhunë dhe urdhër mbrojtje kanë ardhur duke u shtuar përgjatë viteve 2020 dhe 2021.
Sipas statistikave të marra nga Drejtoria Vendore e Policisë Vlorë, në vitin 2020 ka pasur 149 denoncime për veprën penale “Dhunë në familje” si dhe 208 kërkesa për urdhër mbrojtje.
Statistikat flasin negativisht edhe për vitin 2021 ku këto raste kanë ardhur në rritje. Sipas statistikave, të cilat flasin përkatësisht për periudhën janar-tetor 2021, duket qartë se shifrat në 10 muaj janë më të larta se ato të një viti të plotë paraardhës. Pra nga janari deri në tetor të 2021, janë regjistruar 160 denoncime për veprën penale “Dhunë në familje” dhe 215 kërkesa për të përfituar urdhër mbrojtje.
Gjykata e Vlorës ka bërë një përmbledhje të shifrave të cilat lidhen pikërisht me dhunën në familje, si dhe veprimet e ndërmarra prej tyre.
Përgjatë vitit 2021 nga janari e deri në shtator, janë dhënë 103 urdhër mbrojtje të menjëhershme, dhe 95 urdhër mbrojtje. Gjithashtu, nga 39 kërkesa penale për dhunën në familje, 25 janë arrest me burg, 3 me arrest shtëpie dhe 1 detyrim paraqitje.
Rastet janë rritur në periudhën e izolimit nga pandemia, kjo për shkak të stresit dhe problemeve ekonomike, të cilat shkaktuan debate e probleme tek familjet shqiptare. Një problem madhor në lidhje me dhunën është dhe mos ekzekutimi i këtyre urdhër mbrojtjeve. Në këto 9 muaj, 360 raste janë trajtuar në klinikën ligjore të qendrës psikosociale “Vatra”, të cilat janë referuar nga policia apo gjykata.
Në 6 vitet e fundit, në policinë e qytetit bregdetar janë bërë 760 denoncime për dhunë dhe 1392 kërkesa për urdhër mbrojte. Ndër të tjera bie në sy se ka një numër të madh të të dhunuarave të cilët tërheqin denoncimin e bërë. Kjo për shkak të presioneve të ndryshme, frika nga dhunuesi apo të tjerë faktorë.
Por, si ndikoi pandemia?
Gjatë izolimit total, por edhe atij me orar të pjesshëm, numri i rasteve të dhunës ishte shumë i madh. Një pjesë e tyre për shkak të afatit shumë të vogël i cili i lejonte të dilnin nga banesa. Ekonomia përgjatë periudhës së izolimit mori një goditje shumë të madhe, ku familje të tëra nuk kishin asnjë të ardhur për të siguruar furnizimin me ushqim. Madje duke u ngritur dhe disa herë në protesta ku akuzonin shtetin për keqmenaxhim. Ky është ndër shkaqet kryesore që solli konflikte të shumta brenda familjeve ku bashkëshortët debatonin me njëri-tjetrin, duke kaluar dhe në dhunë fizike.
Po në të njëjtën periudhë stresi i shkaktuar ishte një tjetër faktor negativ i cili ndikoi në shtimin e rasteve të dhunës në familje.
Sipas psikologëve, nuk përjashtohen dhe rastet ku dhuna vjen si pasojë e të trashëguarit, ku paraardhësit e tyre kanë qenë persona të dhunshëm, i njëjti shembull i ndjekur dhe nga i biri.
Po ashtu dhe konsumimi i alkoolit apo lëndëve narkotike. Pavarësisht se ndodheshin në izolim, këta persona sërish e gjenin mundësinë për të siguruar një cigare kanabis apo edhe më keq. Si pasojë e efektit të tij, ushtronin dhunë tek personat e afërt.
Në krahasim me vitet e mëparshme, duket se shifrat janë rritur në mënyrë të frikshme. Pra, në 4 vitet e mëparshme kemi një mesatare me 112 denoncime në vit, ndërsa siç duket në dy vitet e fundit janë plot 309.
Në njoftimet e shpeshta që bëhen zyrtare nga Drejtoria Vendore e Policisë në Vlorë, shpeshherë raportohet për rastet e dhunës në familje. Duket se një moshë e prirur drejt ushtrimit të dhunës është dhe ajo mbi 45 vjeç. Madje nuk përjashtohen rastet ku edhe pas denoncimeve për dhunë, vonesës së urdhër mbrojtjeve, personat e dhunuar kanë mbetur viktima të bashkëshortëve të tyre.
Në shkolla duhet të shtohen edhe më tepër programet ku i mësojnë nxënësit se si duhet të sillen, por duket se kjo pjesë vijon të mbetet problem. Gjatë kohëve të fundit janë publikuar shumë lajme ku adoleshentët konfliktohen me bashkëmoshatarët e tyre. Pra, pavarësisht sensibilizimit të bërë, duket se rezultatet janë shumë të vogla në krahasim me atë çka synohet.
