Raportuesja për Kosovën në Parlamentin Europian, Viola von Cramon, ka kritikuar qeverinë e Albin Kurtit për iniciativat në lidhje me tensionet në veri të vendit.
Në një intervistë për mediat e shtetit më të ri në Ballkan, eurodeputetja akuzoi Prishtinën zyrtare se po i drejton gishtin Serbisë si fajtore për situatën e krijuar, edhe pse ajo vetë nuk i ka përmbushur detyrimet e saj.
“Kosova është mirë të fokusohet më shumë tek vetja dhe t’i kryejë detyrimet që ka marrë përsipër. Ju nuk bëni kurrfarë ndryshimi nëse e drejtoni gishtin diku tjetër.
Së paku ky është qëndrimi i institucioneve kryesore të BE. Nëse Kosova dëshiron të bëhet një lojtare e rëndësishme në mesin e komunitetit ndërkombëtar, atëherë duhet të dëshmojë se është një lojtare e besueshme, por këtë nuk është duke e treguar”, deklaroi Von Cramon.
Si zgjidhje e mundshme për qetësimin e situatës, zyrtarja e lartë e Brukselit ka propozuar tërheqjen e plotë të njësive speciale të Policisë së Kosovës nga veriu.
“Do të ishte veprim i duhur që të largohen njësitet speciale të Policisë së Kosovës nga objektet komunale në veri. Para se të flisni për palën serbe është më mirë që fillimisht t’i kryeni detyrat e juaja”, theksoi ajo.
Qeveria e Kosovës ka tërhequr aktualisht 50 për qind të njësive speciale nga katër komunat e veriut.
Discussion about this post