Pas kryeministrit Rama, fjalën e mori presidentja e KE, Ursula von der Leyen e cila e siguroi kryeministrin se Shqipëria do të jetë pjesë e BE.
Për Von der Leyen, Shqipëria i ka kryer të gjitha detyrat dhe tani BE i ka një borxh të madh veçanërisht rinisë shqiptare, ndërsa vetë ajo është e vendosur që vendi tonë t’i hapen sa më shpejt negociatat.
‘’Më la shumë mbresa vizita këtu, takova fëmijët edhe vajzat që luanin volejboll, djemtë basketboll, do të doja që fëmijët e mi të kishin një shkollë të tillë. Falenderoj ekipin, shumë faleminderit. Ky është simbol i miqësisë, por dhe bashkëpunimit, i së ardhmes tonë. I kemi parë fëmijët, vajzat, djemtë. E ardhmja e Shqipërisë është në BE, jemi miq dhe partner. Shqipëria i ka kryer detyrat, e di që ka qenë rrugë e gjatë. Jemi ne ata që duhet të bëjmë pjesën tonë. I kemi borxh rinisë shqiptare që besojnë tek e ardhmja europiane. Është rinia jonë. Jo vetëm me shkollat, por dhe me bashkëpunimin tonë për këto përparësi që ne kemi. Së pari rimëkëmbja nga pandemia, dy shtylla kryesore, nga njëra anë vaksinimi dhe nga ana tjetër rimëkëmbja”.
Gjithashtu presidentja u ndal dhe tek pandemia e Covid, ku tha se BE i ka dhuruar Shqipërisë 430 mijë doza dhe se Evropa do vijojë të jetë pranë Shqipërisë.
Këtu skuadra europiane do të qëndrojë krahë jush. Kemi pasur një problem në fillim fqinjët e Ballkanit Perëndimor, por do e tejkalojmë, BE ka dhuruar 430 mijë doza në Shqipëri, do të vijojnë. Vaksinat shpëtojnë jetë, shpëtojnë të dashurit e zemrës. Me të do të tejkalojmë pandeminë. Sa më i shpejtë Procesi i Berlinit, aq më shpejt dhe integrimi në BE. Shqipëria meriton dhe do të jetë në BE, nuk ka pikë dyshimi. Jap mbështetje të plotë për negociatat me Shqipërinë e Maqedoninë e Veriut sa më shpejt. Ju përmendët disa vështirësi, unë jam e vendosur që të kemi tryezën e parë ndërqeveritare. E kemi diskutuar edhe në të shkuarën, po punojmë për këtë”, tha ajo.
Presidentja e përgëzoi Shqipërinë në përparimin që ka pasur me Reformën në Drejtësi, teksa tha se pret me kënaqësi që të takohet me liderët e rajonit në Samitin e BE javën e ardhshme në Slloveni.
