Presidentja e Komisionit Europian, Ursula von der Leyen shprehet se është e kënaqur që vizitën në BP e ka filluar me vendin tonë.
Përmes një postimi në Twiter, Von der Leyen shkruan se Shqipëria ka përparuar me Reformën në Drejtësi, ndërsa lë të nënkuptohet që e ardhmja e vendit është në BE.
“E kënaqur që fillova vizitën time në Ballkanin Perëndimor në Shqipëri. Mesazhi im është i qartë: e ardhmja e Shqipërisë është në BE. Komisioni Europian i qëndron fort këtij angazhimi. Shqipëria ka arritur qartë përparime me Reformën në Drejtësi. Tani BE -ja duhet të veprojë gjithashtu”, shprehet presidentja.
Von der Leyen zhvilloi një takim me dyer të mbyllura me kryeministrin Rama, ndërsa aktualisht ndodhet në Presidencë për të takuar Metën.
Përpara Samitit BE-Ballkani Perëndimor që pritet të mbahet më 6 tetor, Ursula von der Leyen, do të jetë në Ballkanin Perëndimor nga e marta deri të enjten, për të vizituar Shqipërinë, Maqedoninë e Veriut, Kosovën, Malin e Zi, Serbinë dhe Bosnjën- Hercegovinën.
