Kuvendi i Shqipërisë miratoi në orët e para të mëngjesit të 9 tetorit 2026 reformën territoriale, pas një seance të gjatë parlamentare të shoqëruar me debate të ashpra mes mazhorancës dhe opozitës, ndërsa jashtë godinës së Parlamentit u zhvilluan protesta.
Votimi përfundimtar u zhvillua rreth orës 01:15, ku reforma mori 85 vota pro. Mes deputetëve që votuan kundër ishte edhe Marjana Koçeku, e njohur ndryshe si “Neomalësorja”, e cila e kishte bërë publik qëndrimin e saj kundërshtues që përpara votimit.
Për të dokumentuar votën e saj, Koçeku ka publikuar në rrjetet sociale një video ku shfaqet momenti kur ajo voton kundër reformës territoriale.
Në pamjet e shpërndara, votimi shoqërohet me tensione dhe rrëmujë në sallën e Kuvendit, teksa deputetët e opozitës kundërshtojnë procesin.
Gjatë momenteve të tensionuara, kreu i grupit parlamentar të Partisë Demokratike, Gazment Bardhi, shihet duke hedhur shishe plastike uji në drejtim të deputetëve të mazhorancës.
Pavarësisht kundërshtimeve dhe situatës së tensionuar në sallë, reforma territoriale u miratua me 85 vota pro.
Discussion about this post