Mergim Lazri dhe Flagoert Syla, dy të rinjtë shqiptarë që vranë arkitektin italian gjatë një grabitjeje me armë në shtëpinë e tij, kanë dalë nga burgu, ndërsa bashkëpunëtori i tyre Emirjon Margjini, vijon të qëndrojë në qeli.
Gjykata e Torinos liroi dy nga tre anëtarët e bandës shqiptare, të arrestuar fillimisht dhe të shpallur fajtor për grabitjen që i mori jetën arkitektit Roberti Mottura. Nga tre të arrestuar në fillim, tashmë pas hekurave ka mbetur vetëm Emirjon Margjini, i akuzuar se ka qëlluar arkitektin teksa ai po përpiqej të mbronte familjen e tij.
Menjëherë pas arrestimit, fjalët e Enrico Mottura, vëllait të Robertos ishin:
“Tani karabinierët më njoftuan se i kapën. Vrasësit e vëllait tim u arrestuan dhe tani shpresoj të kalbet në burg. Unë me të vërtetë shpresoj se kjo histori ka ardhur në një pikë kthese. Shpresoj kështu për familjen e vëllait tim, për prindërit e mi, për të gjithë ne. Këta muaj kanë qenë të tmerrshëm”, shtoi ai për La Stampa. “Ata janë hajdutë. Një bandë hajdutësh që shkuan të armatosur. Por mendoni pak: për një vjedhje ata vrasin një person për të marrë nja katër gjëra. E gjithë kjo është çmenduri“, theksoi ai.
Arkitekti ndërroi jetë gjatë grabitjes që ndodhi në vilën e tij në rrugën Campetto 33, natën midis 9 dhe 10 qershorit 2021, ku tre të rinjtë shqiptarë i morën jetën para syve të gruas dhe djalit të tij 12 vjeç.
Discussion about this post