Ish-Prokurorja e Tiranës, Elisabeta Imeraj, duke komentuar ngjarjen e rëndë që ndodhi në orët e para të ditës së sotme në fshatin Larushk në Fushë-Krujë, tha se shënjestër e atentatit ka qenë Gentian Bejtja.
Në emisionin “Open”, Imeraj tha se është një plan i mirëmenduar, autorët kanë pasur një informacion lidhur me lëvizjet, kanë njohur zonën, pasi është nga ato zona që nuk mund të hysh dhe të dalësh lehtë.
“Një ngjarje që janë plagosur dy fëmijë, që tregon se krimi nuk kursen as fëmijët. Janë forma agresiviteti që nuk kursejnë më as gratë, as të miturit, as familjen. Nuk po respektohen më ca norma dhe parime që janë respektuar më parë”, tha Imeraj.
Ish-Kryeprokurorja e Krimeve të Rënda tha se më parë vetë elementët kriminalë shmangnin daljet me familjarët e tyre, me fëmijët, me gratë, pra në njëfërë mënyre ata mbronin familjen e tyre nga goditjet e mundshme. “Sot kemi një tjetër situatë, pasi kemi një agresivitet edhe në shoqëri, kemi media që nisin me artikuj agresiv, që sulmojnë gratë”, tha Imeraj.
Ajo theksoi se krimi është bërë agresiv, nuk pyet më nëse objektivi shoqërohet nga nëna, nga gruaja, nga fëmijët. “Kemi ngjarjen e Don Boskos ku viktimë mbeti një grua e pafajshme. Në Fushë Krujë u plagosën dy fëmijë dhe u vra një person që nuk besoj se ishte objektiv i autorëve”, tha Imeraj.
Discussion about this post