Në një seancë që ka zgjatur vetëm pak minuta në dhomën e një spitali privat, të miturit Mario Përlleshaj iu komunikua masa e arrestit me burg për vrasjen e Martin Canit.
Gjyqtarja Lorena Çabe me kërkesë të prokurores Alma Felaj, i komunikoi të miturit masën e sigurisë arrest në burg.
Në prezencë të avokatit të autorit të dyshuar të vrasjes së Martin Canit, dhe një psikologu, përfaqësuesit e akuzës dhe togave të zeza mbërritën rreth orës 10:30 të të premtes në spitalin ku është i shtruar Mario Përlleshi, që gjithashtu mbeti i plagosur nga përleshja e të hënës.
Seanca ishte planifikuar të zhvillohej të premten në orën 09:30 në Dhomën Penale të Gjykatës së Tiranës, por u pamundësua shoqërimi i të miturit, që ndodhej në spital.
Sipas mjekëve, i riu ka kryer një operacion në pjesën e parakrahut pasi kishte prerë tendinat dhe për pasojë e kishte të pamundur të merrte pjesë në seancën në gjykatë.
Prokuroria ka regjistruar procedimin penal për ngjarjen, referuar nenit 79 për “vrasje në rrethana cilësuese ndaj një ose më shumë personave” dhe “mbajtja pa leje e armëve të ftohta”.
Ngjarja ndodhi kur të miturit sapo kishin përfunduar mësimin në afërsi të shkollës “Fan Noli”. Krimi ishte i paralajmëruar pasi të njëjtët të mitur, 3 ditë para se të ndodhte ishin konfliktuar me njëri-tjetrin, përplasje të cilën e vijuan ditën e hënë.
Autori i dyshuar kishte thirrur një shok të tij, nxënës i shkollës “Fan Noli”. Nga ana tjetër, viktima, Cani, kishte thirrur një shok nga shkolla “Mustafa Qemal Atatürk” në Sauk, me të cilin luante në ekipin U-15 të Dinamos.
Gjatë përplasjes mbeti i plagosur edhe shoku i viktimës, ndërsa autori mori një plagë në parakrah.
Pas ngjarjes, autori u largua me vrap drejt Pazarit të Ri, ku të njohur të tij e çuan me një makinë në një spital privat për mjekim.
Discussion about this post