Vrasja makabre e Sabina Begaj, 23-vjeçares nga Fieri që u vra me kallash nga ish-bashkëshorti i saj, ka tronditur opinioni publik, përfshirë dhe të dy kampet politike në vend.
Ministrja e Shtetit për Parlamentin, Elisa Spiropali e ka konsideruar një krim të llahtarshëm vrasjen e grave dhe nënave në familje. Duke reaguar mbi ngjarjen e rëndë në Fier, Spiropali shkruan se këto krime të rënda lehtësohen dhe ndihmohen nga padrejtësi sistemike dhe praktika korruptive në sistemin e drejtësisë.
“Sabrina 23 vjeç, nënë e një vajze 3 vjeçe, gjeti vdekjen makabre nga një kriminel i liruar rishtas në rrethana të errëta. Vrasja e grave dhe vajzave në familje është krim i llahtarshëm brenda një kodi maskilist patriarkal të atyre që gruan e shohin si pronë me të cilën mund të bëjnë gjithçka; ta mbajnë, ta shesin, ta blejnë, ta dhunojnë, e madje edhe ta asgjësojnë. Këto krime të rënda lehtësohen dhe ndihmohen nga padrejtësi sistemike dhe praktika korruptive në sistemin e drejtësisë”.
Spiropali i bëri thirrje Inspektoratit të Lartë të Drejtësisë të kryejë hetim të thelluar të këtij rasti makabër në krejt hallkat e zinxhirit prokurori- gjykatë.
“Për të nxjerrë të vërtetën dhe për të dënuar sipas ligjit autorët, i bëj thirrje Inspektoratit të Lartë të Drejtësisë të kryejë HETIM të thelluar të këtij rasti makabër në krejt hallkat e zinxhirit prokurori- gjykatë.
Lufta kundër këtij fenomeni kërkon përgjegjësi institucionale dhe dënime shembullore, që raste të tilla të mos përsëriten duke lënë pas trishtimin dhe vulën e turpit mbi një shoqëri të tërë”, shkruan Spiropali.
