Policia italiane ka arritur të identifikojë autorin e vrasjes së shqiptarit 23-vjeçar, Hekuran Cumani, i cili humbi jetën pas një përleshjeje të dhunshme në një pub në Perugia. Sipas të përditshmes La Repubblica, autori është një i ri me origjinë nga Afrika e Veriut.
Sipas dëshmive të mbledhura nga miqtë e viktimës dhe dëshmitarët në vendngjarje, përplasja mes dy grupeve kishte nisur brenda lokalit “100Dieci” për arsye të vogla, por degradoi në dhunë të rëndë jashtë pub-it. Dy grupet përbëheshin nga rreth njëzet persona.
Autori fillimisht plagosi lehtë vëllanë e Hekuranit, Samuelin, dhe më pas i është vërsulur vetë Hekuran Cumanit, duke e goditur me thikë në kraharor. Goditja ka qenë fatale dhe 23-vjeçari nuk mundi t’i mbijetojë plagëve.
Policia dyshon se autori mund të ketë hyrë në lokal pa armë për shkak të detektorit të metaleve dhe më pas ka marrë thikat nga një automjet i ndodhur jashtë lokalit.
Hetimet janë ende në vijim, ndërsa autoritetet po punojnë për arrestimin e plotë të personave të përfshirë në ngjarje.
Discussion about this post