59 vjeçari Martin (Marku) Bardhi u ekzekutua paraditen e sotme, në një atentat të mirëorganizuar në hyrje të qytetit të Rrëshenit, ndërsa tre persona të tjerë të cilët kanë qenë në tavolinë me të mbetën të plagosur.
Vrasja u shënua rreth orës 10:40 minuta (26 shtator 2023), 10 metra përballë komisariatit të Rrëshenit në bar picerinë e tij që ndodhet në hyrje të spitalit të Rrëshenit.
Sipas burimeve, të plagosur kanë mbetur Ilir Bardhoku, ish-drejtor në bashkinë e Mirditës dhe Olti Gjini pronar i një lokal aty pranë, si dhe Indrit Bardhi, të tre të afërm të viktimës, të cilët aktualisht ndodhen në spitalin e Traumës.
Autorët e ngjarjes janë dy persona të maskuar me fuoristradë të cilët pas ngjarjes kanë djegur makinën” deklaroi drejtori i policisë së Lezhës, Alfred Elezi nga vendngjarja.
Ndërkohë, në fshatin Gëziq, Mirditë, është konstatuar duke u djegur një automjet tip fuoristradë, që dyshohet se është përdorur nga autorët, për kryerjen e vrasjes.
Viktima i identifikuar si Martin Bardhi, kishte pak muaj që ishte liruar nga burgu, sepse ishte arrestuar për tentativë vrasje, pasi gjykata kishte caktuar masën ‘detyrim paraqitje’. Dy persona mendohet se janë përfshirë në vrasjen e tij.
Forca të shumta policie kanë rrethuar zonën dhe në ndihmë të Policisë lokale, janë nisur Forcat Speciale “RENEA” dhe FNSH, si dhe në Rrugën e Kombit, në drejtim të Kukësit, të Laçit, Lezhës dhe Dibrës, janë ngritur pika kontrolli.
Discussion about this post