Sot në Gjykatën e Posaçme kundër Korrupsionit dhe Krimit të Organizuar, mjekët ligjorë do të paraqesin rezultatet e analizave të bëra lidhur me gjendjen shëndetësore të të pandehurit Klajdi Dokolli. Burime për Top Channel bënë me dije, i pandehurit për vrasjan e Gentian dhe Nezir Beqirit ka kërkuar lirim nga burgu me pretendimin se vuan nga një sëmundje e pashërueshme. Megjithatë raporti mjekësor do të vlerësojë nëse ka treguar të vërtetën.
Ardian Çapja, Klajdi Dokoli, Etjen Cani dhe Jorgo Leku akuzohen për vrasjen e dyfishtë në Elbasan në vitin 2012 të Gentian e Nezir Beqirit. E gjithë skema e vrasjes është zbuluar nga bashkëpunëtori i drejtësisë, Ervis Bardhi, ndërsa para hetuesëve janë rrëfyer edhe Olsi Leku dhe Klajdi Dokolli.
Vrasja e 2012 ishte kthyer në një mister për Prokurorinë e Elbasanit, të cilët nuk kishin mundur të binin në gjurmët e autorëve. “Il pendito”, Bardhi vendosi të flasë pasi ai u tradhtua nga gjurmë biologjike që kishin mbetur në një automjet që u përdor ditën e krimit. Ai, bashkë me Olsi Lekun u futën në banesë, edhe pse Gentian Neziri ruhej nga forca policie, duke i marrë jetën në gjumë. Atë mëngjes, i vranë dhe të atin, i cili tentoi që të shpëtonte të birin e paralizuar.
Të dy autorët, të cilët e kanë pranuar krimin, janë shprehur se për “punën” u paguan 50 mijë euro. I penduari kujton madje se mbas krimit, Florenc Capja i ka përgëzuar duke u thënë: “Ju lumtë dora dhe mos e vrisni mendjen për këtë punë”. Ky i fundit është ndaluar në Dubai dhe pritet ekstradimi i tij, ndërsa xhaxhai i tij, Ardian Çapja është prangosur disa kohë më parë dhe po përballet me drejtësinë.
