Pas disa orësh qëndrimi në ambientet e Policisë së Gjirokastrës, ku u morën në pyetje si persona në dijeni, dy vëllezërit Danjel dhe Gazmend Braçi, së bashku me babain e tyre Eqerem Braçi, janë lënë të lirë. Burime policore konfirmojnë se deri në këtë fazë të hetimit nuk janë gjetur prova që t’i lidhin ata drejtpërdrejt me ngjarjen tragjike.
Biznesmeni italian, 44-vjeçari Edoardo Sarchi, u gjet pa shenja jete rreth orës 00:30 të mesnatës së kaluar, në një segment rrugor mes Nivicës dhe Salarisë, në vendin e quajtur “Dilan”, Tepelenë. Në trupin e tij u konstatuan shenja plumbi në këmbë, në arterien kryesore, ku gjakderdhja dyshohet se i ka shkaktuar vdekjen.
Sarchi ndodhej për gjueti në zonë së bashku me Eqerem Braçin dhe dy djemtë e tij, si dhe një person tjetër. Në vendngjarje u gjetën dy automjete, përfshirë edhe makinën e viktimës.
Mediat raportojnë se babai dhe dy djemtë e familjes Braçi janë marrë në pyetje katër herë nga strukturat e ndryshme hetimore: Oficerët e Policisë Gjyqësore, Prokuroria, specialistët e Krimeve të Rënda dhe më pas sërish nga OPGJ. Shkak për këtë kanë qenë dëshmitë e tyre kontradiktore. Fillimisht ata kanë deklaruar se e gjetën italianin të vdekur në anë të rrugës; më pas kanë ndryshuar version, duke thënë se e gjetën të plagosur dhe se u shua në duart e tyre. Një tjetër dëshmi përmend se ishin duke gjuajtur së bashku, kur dikush i ndaloi dhe hapi zjarr.
Edoardo Sarchi ka qenë i pranishëm në Shqipëri prej më shumë se 25 vitesh, duke zhvilluar aktivitet tregtar. Ai rezulton administrator dhe një nga pronarët e kompanisë “Tegola Edilcentro” në Laprakë të Tiranës, që merret me prodhim tullash dhe materiale ndërtimi. Prej kohësh ai frekuentonte zonën e Salarisë për gjueti.
Discussion about this post