Vrasja e biznesmenit në Tiranë, arrestohet një prej autorëve

Arrestohet autori i ngjarjes së ndodhur më 16 dhjetor 2022 në Tiranë, ku mbeti i varë me armë zjarri Edmond Papa.

Në pranga është vënë një nga autorët e krimit dhe është shpallur në kërkim bashkëpunëtori i tij.

Policia tha se ka arrestuar shtetasin Albano Velo 30 vjeç, lindur në Këlcyrë Përmet dhe banues në Tiranë, i dyshuar për veprën penale “Vrasja me paramendim” si dhe ka shpallur në kërkim bashkautorin e tij shtetasin A. B., 44 vjeç, banues në Tiranë.

Nga hetimi rezultoi se autorët e kanë ndjekur për disa ditë shtetasin Edmond Papa, para dhe ditën e ngjarjes deri në realizimin e krimit.

Në cilësinë e provave materiale është gjetur dhe sekuestruar automjeti tip “Audi” i përdorur nga autorët e dyshuar para dhe pas ngjarjes, pamje filmike dhe 3 aparate celular.

Edmond Papa u vra me armë zjarri pasditen e 16 dhjetorit në rrugën “Fadil Bodinaku” në Tiranë, në lokalin në pronësi të shtetasit V. Sh.

Mësohet se viktima ka qenë i dënuar më parë në Greqi për drogë, por ende asgjë nuk është konfirmuar nga policia.