Gjokë Gurra dhe djali i tij Eduart Gurra dyshohet se janë qëlluar brenda automjetit me të cilin po udhëtonin drejt shtëpisë së tyre në fshatin Bruçaj në Shkodër.
Burime bëjnë me dije se viktimave u është zënë pritë në një kthesë 500 metra larg shtëpisë dhe duket se autorët kanë pasur informacion të saktë se dy viktimat po udhëtonin në këtë zonë.
Gjithçka dyshohet të ketë nisur pas një telefonate kurth e cila i ka njoftuar ata se banesa e tyre në fshat ishte djegur për shkak të flakëve.
Autorët i kanë qëlluar nga distanca me breshëri automatiku duke i lënë të vdekur brenda fuoristradës së tyre. .
Pasi janë siguruar se Gjokë Gurra dhe Eduart Gurra kanë ndërruar jetë, autorët janë larguar në drejtim të paditur. Një nga pistat që policia po heton është fakti se ka dyshime se Gurra mund të ketë dhënë informacion në lidhje me mbjelljen e kanabisit në këtë zonë, pasi ishte kryeplak i fshatit Bruçaj.
Para disa vitesh ai ka qenë efektiv policie në radhët e policisë së Shkodrës dhe ruante kontakte me ish-kolegët e tij. Nga ana tjetër, një pistë për hetimin për vrasjen e tyre është dhe edhe aktiviteti i tyre në shitjen e lëndëve drusore.
Ndërkohë nuk përjashtohen edhe konflikte të tjera që Gjokë Gurra dhe djali i tij mund të kenë pasur me persona të ndryshëm. 52-vjeçari ishte edhe pronar i një lokali në afërsi të drejtorisë vendore të policisë Shkodër, ku edhe banonte prej vitesh.
Zbardhja e ngjarjes mbetet e vështirë për shkak se forcat e policisë kanë mbërritur pas 2-3 orësh sepse rruga është e amortizuar në një terren të vështirë malor, çka i ka favorizuar autorët që të kryejnë vrasjen dhe të largohen në drejtim të paditur.
Discussion about this post