Kryetari i Grupit Parlamentar të Partisë Demokratike, Gazment Bardhi, ka reaguar pas vrasjes tronditëse të gjyqtarit Astrit Kalaja, i cili u ekzekutua në ambjentet e Gjykatës së Apelit. Bardhi e cilëson ngjarjen si më të rëndën në 35 vite demokraci dhe kërkon dorëheqjen e dy ministrave përgjegjës.
“Ngjarja kriminale që ndodhi në Gjykatën e Apelit, ku mbeti i vrarë gjyqtari Astrit Kalaja, është prej atyre që të lënë pa fjalë. Një akt i pashoq që trondit themelet e sistemit të drejtësisë dhe të rendit demokratik,” – tha Bardhi në një deklaratë për mediat.
Duke shprehur ngushëllime familjes së gjyqtarit dhe komunitetit të juristëve, Bardhi bëri thirrje për dënim maksimal ndaj autorit të ngjarjes. Ai paralajmëroi se vetëgjyqësia, e nxitur sipas tij nga sulmet e Kryeministrit ndaj sistemit të drejtësisë, po rrezikon sigurinë e institucioneve.
“Vetëgjyqësia ndaj vendimeve gjyqësore, që ka nisur me sulmet e hapura të Kryeministrit ndaj gjyqtarëve dhe prokurorëve për vendime që nuk i pëlqejnë, nuk ka vend në një shoqëri demokratike. Nxitja për vetëgjyqësi është po aq e dënueshme sa edhe vrasja e një gjyqtari në krye të detyrës,” – u shpreh Bardhi.
Sipas tij, kjo është hera e parë në këto 35 vite që një gjyqtar ekzekutohet në krye të detyrës vetëm sepse zbatoi ligjin dhe ndërmori një vendim sipas bindjes së tij profesionale.
Bardhi kërkoi dorëheqjen e menjëhershme të Ministrit të Drejtësisë, Besfort Lamallari, dhe Ministres së Brendshme, Albana Koçiu, për dështimin e garantimit të sigurisë së profesionistëve të drejtësisë në ambientet e punës.
“Një gjyqtar apo prokuror nuk mund të cënohet për shkak të ushtrimit të detyrës. Kjo do të pamundësonte funksionimin e drejtësisë së lirë dhe të pavarur,” – deklaroi Bardhi.
Ai përfundoi me një apel për bashkim të shoqërisë dhe institucioneve për të ndëshkuar me forcën e ligjit këtë akt të paprecedentë, që të mos përsëritet më në Shqipëri.
Discussion about this post