Prokurori i Përgjithshëm Olsian Çela ka reaguar pas ngjarjes tragjike të ndodhur sot në ambientet e Gjykatës së Apelit të Juridiksionit të Përgjithshëm në Tiranë, ku gjyqtari Astrit Kalaja u vra me armë zjarri dhe dy persona të tjerë mbetën të plagosur.
Në deklaratën për mediat, Prokurori i Përgjithshëm e cilësoi këtë akt si një ngjarje shumë të rëndë, e cila përveç humbjes së jetës dhe plagosjeve, cënon thellësisht funksionimin e shtetit ligjor dhe integritetin e sistemit të drejtësisë.
Ai shprehu ngushëllimet më të sinqerta për familjen e gjyqtarit Kalaja, ndërsa u bëri thirrje të gjitha institucioneve dhe shoqërisë që të ndërgjegjësohen për rëndësinë e garantimit të sigurisë së magjistratëve në çdo aspekt.
Po ashtu, Prokurori i Përgjithshëm ka urdhëruar Prokurorinë pranë Gjykatës së Shkallës së Parë të Juridiksionit të Përgjithshëm, Tiranë, që të kryejë një hetim të shpejtë, të plotë dhe të thelluar mbi ngjarjen, në bashkëpunim të ngushtë me Policinë e Shtetit.
Ngjarja ka shkaktuar tronditje të thellë në opinionin publik dhe në radhët e sistemit të drejtësisë, ndërsa kërkesat për masa të rrepta sigurie për gjyqtarët dhe prokurorët janë shtuar ndjeshëm.
Discussion about this post