Dy autorët e dyshuar për vrasjen e Hekuran Billës një vit më parë në Tiranë, janë liruar sot me vendim Gjykate. Masa e sigurisë ka ndryshuar nga arrest me burg në arrest shtëpie, për shkak të mbarimit të afateve të paraburgimit Viktor Markun dhe Sebastian Malin.
Këta të fundit janë ndaluar si persona të dyshuar për vrasjen e Hekuran Billës mbrëmjen e 11 qershorit 2020 në Tiranë, në zonën “Komuna e Parisit”.
Ngjarja dyshohet të ketë ndodhur për hakmarrje, teksa Billa u mor i pandehur për vrasjen e një të afërmit të tyre P. Markut në Britaninë e Madhe në 2006. Për krimin, Billa ishte dënuar përjetë, por më pas përfitoi nga gjykimi i shkurtuar, me vendim të gjyqtares Enkeleida Hoxha, e cila ndodhet pas hekurave për lirimin e të dënuarve përjetë nga qelia.
Në janar të këtij viti grupet hetimore gjetën në automjetin Nissan Micra që i dyshuari S. Mali, mësohet ta ketë marrë me qira, 3 fije floku nga ku janë përfituar dy kampione ADN. Provë kjo e fortë, e cila do të vërtetojë përfshirjen e autorëve të dyshuar në këtë ngjarje. Prandaj pritet që, me vendim prokurorie kampionet të krahasohen me kampionet e dy të dyshuarve.
E në këtë mënyrë nëse do të konstatohet përputhshmëri, atëherë rezultati do të jetë një provë vendimtare për fajësinë e të dyshuarve, dajë e nip, të cilët sipas prokurorisë organizuan dhe ekzekutuan Billën për motive hakmarrjeje.
