Autori kryesor i dyshuar për vrasjen e ish-drejtorit të Tensionit të Lartë të Veriut Sajmir Jakut më 2016, është lënë në burg nga Gjykata e Lezhës. 40- vjeçari mohon të ketë lidhje me akuzat dhe ngjarjen. Ndërsa ndaj tij rëndojnë dy vepra të rënda penale “Vrasja në rrethana të tjera cilësuese”, kryer në bashkëpunim dhe “Prodhimi dhe mbajtja pa leje e armëve luftarake e municionit”.
Arrestimi i Keqit
Ndalimi i tij u bë në datë 27 korrik të këtij viti, për atentatin e bujshëm të 9 shtatorit 2016 në mes të Rrëshenit. Arrestimi erdhi në mënyrë rastësore pasi Keqi u kap në gjendje të dehur duke i dhënë makinës së tij në aksin kombëtar të Kurbinit. Një patrullë policore mori shenjat e tij të gishtave dhe nisi procedimin penal për drejtim automjeti në gjendje të dehur. Por, një rastësi e tillë shërbeu çuditërisht si çelës i zbardhjes së vrasjes së Saimir Jakut. Nga kontrolli i shenjave të gishtërinjve të personave të proceduar dhe të arrestuar më parë, rezultoi se gjurmët kapilare në gishtat e Dorian Keqit rezultonin të përputhshme 100% me shenjën e gishtit në bidonin me benzinë brenda makinës së djegur me të cilën u realizua atentati ndaj ish-anëtarit të Këshillit Bashkiak të Partisë Socialiste në Mirditë. Më pas, uniformat blu bënë shoqërimin e Dorian Keqit, i cili tashmë do t’i nënshtrohet procesit gjyqësor. Sipas të dhënave policore, ai nuk ka pasur precedentë të mëparshëm penal. Gjatë arrestimit, 40-vjeçari nga Kruja u prezantua si punëtor ndërtimi. Atentati ndaj Saimir Jakut në qendër të Rrëshenit në vitin 2016 u pasua nga një seri atentatesh e hakmarrjesh mes fiseve Reçi e Jaku.
Vrasja e Saimir Jakut, viktima jepte para me fajde
Ish-drejtori Tensionit të Lartë të Veriut, Saimir Jaku, 33 vjeç, u ekzekutua me kallashnikov në një lokal në qendër të Rrëshenit. Ai ndodhej me mikun e tij Gjergj Prenga. Ky i fundit u plagos. Sipas dëshmitarëve, dy persona të maskuar dolën nga një makinë dhe njëri prej tyre hapi zjarr ndaj Jakut. Ata u larguan me shpejtësi dhe e dogjën makinën një fshat të Kurbinit. Pavarësisht se u gjet një gjurmë gishti në bidonin me benzinë brenda makinës, për 6 vite policia nuk arriti të identifikonte se kujt i përkiste shenja identifikuese, deri ditën e djeshme. Për sa i përket viktimës, ai ishte anëtar i Këshillit Bashkiak të Lezhës për PS dhe mendohet se jepte para me fajde. Larja e borxheve ka qenë një nga pistat që policia e Lezhës ka hetuar, por ajo kryesore është seria e hakmarrjeve mes familjeve Jaku dhe Reçi në Lezhë.
Discussion about this post