Prokurori i cili hetoi vrasjen e Klodian Rashës, Ardian Braho u shkarkua këtë të hënë nga shkalla e parë e vetingut.
Me shumicë votash, 2 pro dhe 1 kundër, Braho u shkarkua për probleme me pasurinë.
Braho ishte prokurori i çështjes së vrasjes së të riut, Klodian Rasha, nga efektivi i Policisë, Nevaldo Hajdaraj, ngjarje e ndodhur 8 dhjetorin e vitit të kaluar, në kryeqytet.
Hajdaraj u dënua me 15 vite burg për vrasjen e Rashës, dënim që për shkak të gjykimit të shkurtuar shkoi në 10 vite. I dënuari ka apeluar vendimin, por këtë gjë e ka bërë edhe prokuroria, që kishte kërkuar dënimin me 20 vite të ish-efektivit.
Ja si u vra Klodian Rasha
Vrasja e të riut Klodian Rasha në kryeqytet, muajin dhjetor të vitit të kaluar u kthye në kryefjalën e vendit dhe gjithë opinionit publik. Pas shumë spekulimesh lidhur me hetimet dhe dinamikën e kësaj ngjarjeje, në përfundim ish-polici Hajdaraj u arrestua me akuzën për “vrasje me dashje” ndaj 25-vjeçarit Rasha. Konkretisht sipas verifikimeve të bëra nga prokuroria, rezulton se 25-vjeçari nuk ka patur armë me vete gjatë përplasjes me efektivin, teksa më pas është qëlluar nga ky i fundit. Po ashtu sa i takon armës së gjetur rreth 200 metra larg vendngjarjes, nga hetimet e Prokurorisë gjithashtu rezulton se nuk i përkiste Rashës, pasi nga analiza e ADN-së është vërtetuar që nuk ka asnjë gjurmë të tij në armën e tipit pistoletë turke sportive. Edhe pse për këtë provë të fundit Hajdaraj kishte pretenduar në polici se i riu kishte nxjerrë armën dhe prandaj është detyruar ta qëllojë, në kushtet e vetëmbrojtjes, pretendim është hedhur poshtë pas hetimeve të kryera. Sakaq referuar pamjeve filmike mësohet se në një servis pranë të cilës ka ndodhur ngjarja, efektivi është pozicionuar i shtrirë në trotuar në një distancë prej 5 metrash, për të qëlluar me armën e shërbimit në drejtim të Rashës i cili ishte duke u larguar me vrap. E theksojmë se sipas grupit hetimor dallohet që viktima ka qenë duke u larguar me vrap, në momentin që është qëlluar për vdekje.
