Saqine Saliaj, e ëma e Kudrejt Saliajt, i cili u vra nga vjehrri i tij, Mexhit Picari të premten në kryeqytet, ka deklaruar në polici se ka qenë në dhunë të vazhdueshme nga nusja e djalit, Dhurata Saliaj. Konkretisht, një kallëzim i datës 2 tetor 2020, tregon sesi e moshuara ka denoncuar se Dhurata e kanoste në telefon.
“Në datën 02.10.2020 Saqine Saliaj ka kallëzuar në polici se nusja e djalit të saj, e pandehura Dhurata Saliaj ka ushtruar në mënyrë të vazhdueshme dhunë psikologjike ndaj saj dhe fëmijëve të saj. Kallëzuesja ka deklaruar se e kallëzuara ka marrë disa herë në telefon dhe e kanosur me fjalë të ndryshme: “do të vras ty, mbesën dhe gocën” e fjalë të tjera kërcënuese.”-, ka deklaruar e moshuara.
Ajo ka qenë sot e pranishme në gjykatën Penale të Tiranës, ku ka deklaruar se problemet me familjen Picarii kanë qenë të shpeshta dhe datojnë që prej disa vitesh.
Ngjarja e rëndë ndodhi 3 ditë më parë në një lokal pranë Gjykatës së Tiranës, ku Mexhit Picari qëlloi për vdekje dhëndrin e tij, Kudret Saliaj dhe plagosi avokatin e tij, Adriatik Camajn. Ky i fundit fatmirësisht është jashtë rrezikut për jetën, ndërsa ngjarja ka ndodhur në mes të ditës në një nga zonat më të frekuentuara të Tiranës.
Autori dhe e bija, janë të dy pas hekurave, pasi akuzohen për vrasjen e Saliajt. Prokuroria pritet të kërkojë sot në gjykatën Penale të Tiranës masën e sigurimit “arrest me burg”. Dhurata Saliaj, vajza e Mexhit Picarit u arrestua disa orë pas vrasjes, me akuzën e bashkëpunimit në vrasjen e bashkëshortit të saj, me të cilin ishte në proces divorci.
