Detaje të reja janë zbardhur në gjykatën Penale të Tiranës ku është duke u zhvilluar seanca në ngarkim të Mexhit Picarit dhe të bijës së tij, Dhurata Saliaj. Në gjykatë, Mexhit Picari ka treguar se Kudret Saliaj ka nxjerrë nga shtëpia rrobat e të bijës, dhe kur ata i kanë marrë mungonin disa florinj. “Mungonin disa florinj, i thashë vajzës të rrinte e qetë.”-ka thënë autori në gjykatë.
Ngjarja e rëndë ndodhi 3 ditë më parë në një lokal pranë Gjykatës së Tiranës, ku Mexhit Picari qëlloi për vdekje dhëndrin e tij, Kudret Saliaj dhe plagosi avokatin e tij, Adriatik Camajn. Ky i fundit fatmirësisht është jashtë rrezikut për jetën, ndërsa ngjarja ka ndodhur në mes të ditës në një nga zonat më të frekuentuara të Tiranës.
Autori dhe e bija, janë të dy pas hekurave, pasi akuzohen për vrasjen e Saliajt. Prokuroria pritet të kërkojë sot në gjykatën Penale të Tiranës masën e sigurimit “arrest me burg”. Dhurata Saliaj, vajza e Mexhit Picarit u arrestua disa orë pas vrasjes, me akuzën e bashkëpunimit në vrasjen e bashkëshortit të saj, me të cilin ishte në proces divorci.
