Të tjera detaje janë zbardhur nga vrasja e Nikolin Lekstakaj, 42-vjeçarit që u ekzekutua me breshëri kallashnikovi në Balldre, sapo doli nga një market, shumë pranë banesës së tij.
Sipas Euronews Albania, viktima kishte hyrë në market për të blerë një pijë freskuese dhe kishte ndarë një bisedë të shkurtër me shitësen dhe një fëmijë të mitur që ndodhej aty.
Në momentin që ka dalë nga marketi, ndaj tij është qëlluar me breshëri nga një makinë në lëvizje, e cila u largua me shpejtësi pas krimit.
Sipas raportimeve, në zonë janë siguruar pamjet nga dy kamera sigurie, por pamjet janë me cilësi të dobët dhe vështirë se mund t’i shërbejnë grupit hetimor për të zbuluar identitetet e autorëve të dyshuar të krimit.
Në vrasjen ndaj Lekstakajt dyshohet se kanë marrë pjesë dy persona, njëri në rolin e ekzekutorit dhe tjetri në rolin e drejtuesit të mjetit.
Një ditë pas krimit, në zonën e Gjadrit, rreth 10 km nga vendi ku u ekzekutua Lekstakaj, u gjet një automjet Benz i zi, i ngjashëm me atë që kanë fiksuar kamerat e sigurisë në momentin e vrasjes së 42-vjeçarit. Makina që u gjet e djegur rezulton e vjedhur prej shtatorit të vitit të kaluar në Dimal.
Brenda në automjet janë gjetur një armë zjarri automatik dhe disa gëzhoja, të cilat pritet t’i nënshtrohen ekspertizës.
Vrasja e Lekstakajt dyshohet se është kryer për motive gjakmarrjeje. 42-vjeçari u ekzekutua fiks 3 muaj nga vrasja e Ardian Nikulajt, biznesmenit që u qëllua për vdekje në lokalin e tij, teksa konsumonte kafe. Policia në atë kohë deklaroi se ekzekutori i Nikulajt ishte një portugez, i ndihmuar nga një grup shtetasish të huaj, ndërsa si porositësh i vrasjes ishte një shqiptar, nip i fisit Lekstakaj.
Dy fiset Lekstakaj dhe Nikulaj janë në hasmëri mes tyre prej të paktën 26 vitesh, ndërsa për ngjarjen e ndodhur dy ditë më parë policia po heton që krimi të ketë ndodhur për motive hakmarrjeje.
Discussion about this post