Vrasja e Pëllumb Metës, Apeli lë në fuqi masat për fëmijët

Gjykata e Apelit ka lënë në fuqi masën arrest me burg për Hysen dhe Amarildo Metën, të cilët ndodhen në burg pas vrasjes së babait Pëllumb Meta.

Të dy kishin kërkuar ndryshimin e masës së sigurisë nga arrest në burg në “detyrim për t’u paraqitur në policinë gjyqësore”, por kërkesa e tyre u rrëzua nga Gjykata e Apelit.

Vetëm dy djemtë kishin kërkuar ndryshimin e masës, ndërkohë që vajza Hygerta Meta ka marrë përsipër krimin duke thënë se ajo e ka vrarë babanë.

“Çështja në apel u shqyrtua mbi bazën e ankimeve të bëra, nga personat nën hetim me iniciale H. M dhe A. M, të cilët kërkuan ndryshimin e vendimit caktimin e një mase sigurimi personal atë të ‘detyrimit për tu paraqitur në policinë gjyqësore’. Në përfundim të gjykimit, sot më datë 02.04.2024, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtare Znj. Alma Kolgjoka,  vendosi: Miratimin e vendimit nr. 127/1 Regj., datë 26.02.2024 të Gjykatës së Shkallës së Parë e Juridiksionit të Përgjithshëm Durrës”, thuhet në një njoftim të gjykatës.