Pëllumb Meta u ekzekutua me armë zjarri në banesën e tij, ndërsa trupi i tij u tentua të zhdukej duke u groposur në një kasolle bagëtish. Si autorë të dyshuar të krimit u arrestuan dy djemtë dhe vajza e viktimës, ndaj të cilëve sot Gjykata e Durrësit vendosi masën e sigurisë “arrest me burg”.
Pas vrasjes së Metës, autorët e dyshuar ngritën alibinë se ai ishte zhdukur, madje bënë edhe kallëzimin në polici, ndërsa kjo e fundit pas 10 ditësh nga denoncimi arriti të zbardhë krimin. Viktima ishte qëlluar me armë zjarri teksa ndodhej i shtrirë në një nga dhomat e shtëpisë, më pas trupi u zhvendos në kasollen e bagëtive ku u gropos.
Elton Shahini, shefi i Krimeve të Rënda në Drejtorinë e Policisë së Durrësit, për emisionin Top Story ka sqaruar detaje lidhur me hetimet që janë kryer nga policia për zbardhjen e krimit.
“Pasi fëmijët bënë kallëzim për humbjen e babait kanë deklaruar se nuk ishte hera e parë që largohej, nga dy deri në 10 ditë. Ata thonin se ishte konsumues dhe kishte probleme.
Më pas është gjetur makina e Pëllumbit, rreth 2-3 kilometra larg nga banesa e viktimës. Pasi u gjet mjeti u kërkua në këtë sektor, pasi menduam që trupi mund të ishte pranë makinës. Më pas janë marrë sërish familjarët, teksa jepnin versionin e tyre. Ne kishim dyshime se personi nuk kishte konflikte dhe ngulëm këmbë se ishte diçka e brendshme. I vumë përpara faktit që është diçka e brendshme. Hyseni gjatë intervistimit na tregoi se çfarë kishte ndodhur duke e shpallur fajtore Hygertën.
Fillimisht Hygerta kishte një fabul shumë të bukur që e kishin bërë ndërmjet tyre, na çoi tek kasollja, ku tregonte se i kishte bërë të gjitha vetë.
Të gjitha këto na lanë të dyshonim se s’mund ta bënte ajo. Familjarët e kishin ndarë rolet më parë. Esenciale ishte se kqyrëm banesën dhe tek divani gjetëm një predhë të armës së zjarrit.
Fillimisht është gjetur vetëm predha, më pas janë marë mostrat e gjakut. Impresioni im është që jam habitur, dhe janë marë dy herë intervistimet e tyre. Ata ishin të qetë, të gjithë. Menduam që këtu nuk kemi asgjë. Pas kësaj që u gjet motivi dhe viktima këta kanë pasur çiltërsi dhe qetësi, as pendim.
Nuk kisha parë asnjë rast të tillë. Nuk e mora të mirëqenë që ishte fejesa me shkuesi për vajzën. Nga deklarimet e tyre ata kanë pasur stres të vazhdueshëm gjatë kësaj kohe, dhunë fizike dhe psikologjike. Kemi të dhëna se ky person punonte tek tregu dhe ishte person i qetë, por në familje ushtronte dhunë. Nga familjarët është deklaruar, nuk është konfirmuar ende, pasi s’ka pasur asnjë denoncim. Kur kishim vajzën dhe mamanë në zyrë, i thamë që pse s’jeni ankuar në polici. Nuk përgjigjeshin, kishin trysni të vazhdueshme nga viktima. Çështja është në hetim, por deri diku tabloja është e zbardhur, motivet deri diku ato që kemi janë të qarta.
Ky është një krim makabër që do të shqyrtohet gjatë, gjatë intervistimet që bëmë me vajzën, e pyesja, ishte studente e gjuhëve të huaja, që kur të mbarosh shkollën çfarë do të bësh. Se doja ta nxirrja që se kishte bërë ajo. I thash si mund ta bëje këtë gjë kur ke këto ëndrra, dhe më tha që kur është dhuna prishen ëndrrat”, tha shefi i Krimeve të Rënda në Durrës, Elton Shahini.
Discussion about this post