Gjykata e Apelit të Juridiksionit të Përgjithshëm ka pranuar kërkesën e ish-efektivit të RENEA, Arbër Paplekaj, për kryerjen e një ekspertimi kriminalistik nga ekspertë të fushës në lidhje me vrasjen e ish-zyrtarit në Elbasan, Pjerin Xhuvani.
Me këtë vendim, Gjykata rihap pjesërisht shqyrtimin gjyqësor ndaj Paplekajt.
Gjithashtu, Apeli ka vendosur të marrë informacion në lidhje me dy shtetasit, të cilët akuzohen për “Dëshmi të rreme”, kryer në gjykimin e zhvilluar në Gjykatën e Shkallës së Parë e Juridiksionit të Përgjithshëm Elbasan si dhe të merret informacion mbi vijimin e procedimit penal të pezulluar për personat, që kanë qëlluar me armë zjarri në vendngjarje.
Gjithashtu, do të kërkohet informacion në lidhje me hetimet që po kryhen për identifikimin e personave të tjerë që qëlluan në vendngjarje.
Gjykata e Elbasanit ka shpallur fajtor ish-efektivin e repartit RENEA, Arbër Paplekaj, duke e dënuar me 22 vite burgim për akuzën e vrasjes në rrethana cilësuese.
Në lidhje me këtë rast është prononcuar avokati i tij, Mirash Martini, ku tha se gjykata refuzoi të njihej me të vërtetën e plotë të ngjarjes. Ai tha se që nga fillimi i ngjarjes, nga policia dhe organet e Prokurorisë ka pasur përpjekje për të fshehur episode dhe në mënyrë të veçante dhe akte të mëvonshme që e kane deformuar këtë rast.
“Në këto dy vite kam jetuar me dhimbjen e familjes Xhuvani, dhe gjej rastin edhe një herë tu shpreh ngushëllimet. Media në këtë ngjarje ka qenë me afër së vërtetës se policia dhe Prokuroria që e kanë detyrë zbardhjen e së vërtetës. Që nga fillimi i ngjarjes nga policia dhe organet e Prokurorisë ka pasur përpjekje për të fshehur episode, dhe në mënyrë të veçante dhe akte të mëvonshme që e kane deformuar këtë ngjarje. Une dhe Arber Papleka kemi qene të interesuar maksimalisht që të shkojmë tek e verteta. Dhe ky është parimi themelor mbi të cilin Gjykata duhet të bazohet për të dhënë një vendim të drejtë.
Megjithë konsideratën qe kam shpreh për Gjykatën, për respektimin formal të procedurave, ata kanë rrëzuar disa kërkesa tonat në mënyrë të vazhdueshme që lidhen me sqarimin e së vërtetës dhe rregullimin e disa deformimeve që kanë të bëjnë me rindërtimin e vendit të ngjarjes dhe me zhvillimin e një eksperimenti hetimor, që do të përcaktonte vendndodhjen e qitësve dhe rrethana të tjera.
Natyrisht rrëzimi i kësaj kërkese ka qenë refuzim për ta mësuar të vërtetën dhe për të shkuar tek e vërteta. Por edhe ky vendim qe sapo thashë, është rrjedhojë e këtyre rezultateve. Pra e një gjysme të vërtete. T’ju shpjegoj gjysmë të vërtetën.
Gjysmë e vërteta ka të bëjë me faktin që tashmë është e provuar qe Arbër Papleka në vendngjarje ka qëlluar me armë. Por pjesa tjetër e kësaj të vërtete. Kushtet cilat kanë qenë, rrethanat etj janë refuzuar për tu mësuar nga këto organe. Dhe siç e dini një gjysmë e vërtetë është një gënjeshtër e madhe, dhe në drejtësi është edhe shumë e dëmshme”, tha avokati, pasi Gjykata e Elbasanit shpalli vendimin.
Më 21 prill 2021, 4 ditë para zgjedhjeve parlamentare të 25 prillit, në Elbasan u vra Pjerin Xhuvani, përkrahës i Partisë Socialiste. Paplekaj, u tha se ishte pjesë e një “SMV”, strukture për Mbrojtjen e Votës e ngritur në Elbasan nga PD.
Pas një sherri verbal pasi SMV dyshonte se Xhuvani ishte pjesë e një grupi që blinin vota, ndodhi vrasja ku mbeti i pajetë Xhuvani dhe u plagosën 4 persona të tjerë.
Të plagosurit ishin Paulo Vuksani, Emiljano Prenga, Eltjon Bodinaku dhe Xhensila Sota. Por procesi në shkallën e parë nuk zbardhi se kush qëlloi ndaj Emiljano Prengës dhe Paulo Vuksanit, të dy ish-policë.
Discussion about this post