Gjykata e Apelit ka liruar nga qelia ish-efektivin e RENEA-s, Arbër Paplekaj, i dënuar për vrasjen e Pjerin Xhuvanit, ngjarje që ndodhi 4 ditë para zgjedhjeve të 25 prillit 2021 në qytetin e Elbasanit.
Paplekajt iu njoh kryerja e dënimit, pas rishikimit të vendimit të shkallës së parë.
Në fillim, Paplekaj ishte dënuar me 22 vite burg, por më pas kërkoi rihapjen e procesit. Apeli i Juridiksionit të Përgjithshëm ndryshoi vendimin e gjykatës së Elbasanit, duke ulur dënimin në 7 vite heqje lirie dhe ndryshuar akuzën nga “vrasje në rrethana cilësuese” në “vrasje në kushtet e tronditjes psikike”.
Gjykata e Apelit shpalli gjithashtu të pafajshëm gjashtë efektivët e Shqiponjave – Dedion Duraku, Pëllumb Biçaku, Erion Balla, Erion Meçja, Donald Dedja dhe Besmir Kadiu – të cilëve gjykata e Elbasanit u kishte dhënë dënimin me 16 muaj shërbim prove. Po ashtu, dy ish-zëvendësdrejtorët e Policisë së Elbasanit, Albert Nushi dhe Nikollaq Palla, u shpallën të pafajshëm, pasi gjykata e Elbasanit ua kishte dhënë nga 1 vit shërbim prove secilit.
Ngjarja ka ndodhur gjatë një shkëmbimi zjarri ku mbeti i vrarë Pjerin Xhuvani dhe të plagosur Emiljani Prenga, Paulin Vuksani – dhëndri i Xhuvanit, Edjon Budani dhe efektivja e policisë Xhensila Sota. Paplekaj ka pranuar krimin, duke deklaruar se qëlloi për vetëmbrojtje pasi u qëllua më parë nga persona që sipas tij po blinin vota.
Discussion about this post