Policia ka arrestuar autorin e vrasjes së tre grave dhe plagosjes së katër personave të tjerë në Itali. Njëri prej dëshmitarëve të pranishëm në vendngjarje dha detaje duke thënë se 57-vjeçari pak para se të niste të qëllonte me armë është dëgjuar duke bërtitur e duke thënë se do t’i vriste të gjithë.
“Ai hyri në dhomë, mbylli derën dhe bërtiti do t’ju vras të gjithëve dhe filloi të qëllonte.”
Kështu tregon dëshmitari i pranishëm në mbledhjen e një konsorciumi bashkëpronësi në Fidene, ku Claudio Campiti, 57 vjeç, hapi zjarr.
Campiti dyshohet se e mori armën nga një poligon pa e kthyer atë. Ai ka nisur të qëllojë sapo është futur në belveder ku po zhvillohej takimi, duke shtënë në drejtim të bordit drejtues të Konsorciumit.
“Unë u përpoqa të hidhesha mbi të, por të tjerët tashmë kishin dalë para tij. Ai kishte bllokuar dyert dhe mua më duhej pak të nxirrja njerëzit jashtë. Po të mos kishim qenë ne do të ishte një masakër… Pranë meje pashë një vajzë që u qëllua dhe vdiq”.
Mësohet se ngjarja ka ndodhur në një agjenci pronash, e cila menaxhon vilat në zonën e liqenit Turano, të përdorura si shtëpi të dyta nga anëtarët e konsorciumit.
“Ishte anëtar i konsorciumit i njohur për të gjithë dhe në të kaluarën kishte bërë kërcënime verbale”, rrëfen një tjetër dëshmitar.
“Shpëtova veten sepse u futa nën tavolinë dhe arrita të zvarritem nga dhoma”, thotë një prej grave që ndodhej në mbledhje.
Discussion about this post