Me urdhër nga Tirana, blutë e Fierit janë ngritur në këmbë për kapjen e autorëve që vranë “kosovarin” që jetonte në jug të Shqipërisë. Arben Isufaj, i njohur dhe me nofkën Ben Qimja, është një nga personat e shoqëruar nga Policia e Fierit për ekzekutimin dy ditë më parë të Demir (Dem) Backës në mes të qytetit.
Mësohet se paraditen e djeshme zëvendës drejtori i policisë së Qarkut Fier së bashku me një trupë policore “Shqiponja”, kanë ushtruar kontroll në zonën që në Fier njihet si “15 katëshi”, ku jeton Arben Isufaj. Ky i fundit është shoqëruar në Polici për të dhënë dëshminë e tij për ngjarjen.
Nga ekzaminimi mjeko-ligjor i trupit të viktimës ka rezultuar se ai është qëlluar me 18 plumba. Tre plumba ne zonën e qafës dhe kokës dhe rreth 15 të tjerë në kraharor. Atentati është kryer nga një grup qitësish profesionistë që besohet shumë se kanë ardhur nga qyteti i Vlorës. Deri në këtë fazë ku ndodhen hetimet, një ndër autorët e dyshuar është dhe Ben Qimja, për shkak të një konflikti të hapur që ka pasur me Dem Backën.
Ky i fundit ka qenë dhe shkaku i sherrit mes “dy të fortëve të Fierit”, pasi nga përndjekur dhe përplasur me makinë mbesën e Dem Backës. Raportohet se një vit e gjysmë më patë viktima Demir Backa ka rrahur në lokalin e tij “Piazza” në mes të qytetit të Fierit Ben Qimen dhe djalin e tij. Kur ata kanë shkuar për t’u sqaruar në lokal, Dem Backa i ka rrahur të dy, Ben Qimen dhe djalin e tij.
Një tjetër pistë që Policia po heton është dhe veprimtaria tregtare e kompanisë “Godolla 2013”, e themeluar nga Backa në vitin 2013, me aktivitet blegtoral në lagunës e Lushnjës. Në këtë zonë janë rreth 200 hektarë tokë e dhënë me koncesion dhe para disa kohësh ka pasur një konflikt mes personit që e ka marrë me koncesion A.P, dhe Demir Backës.
Gjithashtu një pistë verifikuese është dhe ajo e pronave, pasi Demir Backa merrej me procesin e kompesimit të pronave, duke vepruar me prokura të posaçme nga pronarët pretendentë të sipërfaqeve të tokave në zonën e Darzezës. Si rezultat i kësaj pune, viktima ka përfituar me anë të përqindjeve qindra hektarë tokë të pyllëzuar në Darëzezë dhe në këtë sipërfaqe janë prishur disa objekte të ndërtuara nga banorët.
