Një tjetër ekzekutim mafioz, pa gjurmë të autorëve i është shtuar sagës së atentateve të ndodhura muajit e fundit në vend. Vrasja e biznesmenit Demir Backa ka ndodhur në një zonë me lëvizje të shumta dhe në një rrugë kombëtare, ku ka kamera sigurie, po ashtu edhe monitorim të forcave policore. Këtë të fundit e ka konstatuar vetë familja e viktimës të cilët kanë treguar se policët ishin në vendin e ngjarjes por nuk kanë ndërhyrë. Megjithatë hetimi duket se ngelet vetëm tek e shkuara e biznesmenit, ndërsa autorët tashmë janë duke planifikuar zhdukjen e gjurmëve të tyre dhe arratisjen.
Backa ndërroi jetë pak minuta pasi u qëllua nga të paktën dy persona, teksa e kaluara e tij, ka bërë që policia të hetojë në disa pista për të zbardhur krimin e rëndë.
Burime për gijotina.com bënë me dije se pista e parë që po hetohet është konflikti për një pjesë të lagunës në Lushnjë, në Gotull. Janë rreth 200 hektarë e dhënë me koncesion dhe para disa kohësh ka pasur një konflikt mes personit që e ka marrë me koncesion A.P. dhe Demir Backës.
Pista e dytë është ngritur mbi një krim të kryer 23 vite më parë. Në vitin 1998, 57-vjeçarit i kanë ekzekutuar motrën dhe bashkëshortin e saj në afërsi të shkollës së Muzikës në Fier.
Pista e tretë është sërish për çështje pronash. Backa ka pasur qindra hektarë tokë të pyllëzuar në Darëzezë dhe në këtë sipërfaqe janë prishur disa objekte të ndërtuara nga banorët. Po kështu mbetet pista e konfliktit me një person me influence në Fier, i cili ishte subjekt i OFL.
