Një krim mafioz ka tronditur Peqinin, ku një person i paidentifikuar, i cili mendohet rreth 45-vjeç është gjetur i ekzekutuar pranë lumit Shkumbin. Viktima, i cili paraprakisht mendohet se nuk është banor i zonës është gjetur nga kalimtarët pranë plehrave në një zonë të pabanuar dhe menjëherë është njoftuar policia e zonës, e cila është nisur për në vendin e ngjarjes.
Nga këqyrja ka rezultuar se viktima kishte marrë dy plumba nga pas, një në kurriz dhe një mes brinjëve, që mendohet se i kanë shkaktuar vdekjen e menjëhershme. Policia fillimisht ka kontrolluar në rrobat e viktimës për mjet identifikimi, por nuk ka gjetur asnjë, duke e bërë edhe më të vështirë zbardhjen e këtij krimi të rëndë.
Ndërkohë, grupi hetimor dyshon se viktima është qëlluar në vend tjetër dhe më pas është transportuar në zonën ku u gjet i pajetë, e cila nuk është e banuar dhe nuk ka as ndriçim e as kamera sigurie. Megjithatë, për policinë fillimisht duhet bërë identifikimi i viktimës me qëllim që më pas të hetohet mbi motivet dhe autorët e vrasjes.
Për këtë arsye, policia ka kërkuar ndihmën e kolegëve në drejtoritë e tjera vendore për të gjithë personat e shpallur të zhdukur, të cilët janë 40-50 vjeç, me qëllim identifikimin e viktimës. Pas identifikimit të viktimës, i cili mendohet se është nga rajonet përqark vendit të ngjarjes, policia pritet të nisë hetimet për zbardhjen e motiveve dhe kapjen e autorëve.
Trupi i pajetë i viktimës është dërguar në morgun e Elbasanit, ndërkohë që po punohet me familjarët e personave të zhdukur për identifikimin e tij. Sipas grupit hetimor, kjo vrasje është e sofistikuar, pasi autorët nuk kanë lënë gjurmë në vendin e ngjarjes dhe zbardhja e saj do jetë e vështirë, duke të bërë të ngrihen dyshime për një krim mafioz. Një vrasje e tillë vjen vetëm pak ditë pas emërimit të kreut të ri të policisë së shtetit, i cili ka ndërmarrë një analizë të thellë në çdo qark të vendit, por që duket se reforma e tij do të nisë pikërisht nga qarku i Elbasanit.
