“Never Forget” ishte operacioni i ndërmarrë nga Policia e Shtetit mbrëmjen e së mërkurës ku u ekzekutuan 12 urdhër-arreste, ndërsa 4 persona janë shpallur në kërkim.
Drejtori i Përgjithshëm i Policisë së Shtetit, Muhamet Rrumbullaku, duke dhënë detaje nga operacioni tha se janë zbardhur 16 ngjarje kriminale, mes të cilave 6 vrasje, 5 raste të shkatërrimit të pronës me eksploziv, 2 raste të vjedhjes me dhunë dhe 3 raste të sigurimit të kushteve për vrasje.
Sipas Rrumbullakut, këto ngjarje kriminale janë kryer nga ai që njihet si grupi kriminal i drejtuar nga Laret Haxhiu, i cili ndodhet i arrestuar në Greqi, por deri më tani autoritetet greke kanë refuzuar ekstradimin e tij.
Mes personave të arrestuar është edhe 27-vjeçarja Klea Gjata, nga Lushnja, për të cilën raportohet se është partnere e Laert Haxhisë.
“Klea Gjata, 27 vjeçe, banuese në Lushnjë, dyshohet për veprat penale “Përkrahja e autorit të krimit” dhe “Moskallëzimi i krimit”,” tha Rrumbullaku.
Ngjarjet kriminale janë zbuluar pasi Artan Tafani, i arrestuar për grabitje, është kthyer në një bashkëpunëtor të policisë, duke rrëfyer disa nga episodet që më pas çuan në firmosjen e urdhë-arresteve nga Prokuroria e Elbasanit.
Pritet që dosja të kalojë për hetime në SPAK.
Discussion about this post