Modelja shqiptare me famë botërore, Emina Cunmulaj, është një ndër personat publike që ka reaguar ashpër për vrasjen e 19-vjeçares shqiptare në Tuz të Malit të Zi.
Modelja ka reaguar ashpër se përse viktima nuk është në burg, dhe pse nuk respektohen të drejtat e grave dhe vajzave në Mal të Zi.
“Vrasësi i Sheila Bakija, pse nuk është në burg? Pse viktima e raportoi atë në polici disa ditë para vdekjes së saj dhe gjykatësi nuk bëri asgjë? Ku është kompetenca e grave ne Mal të Zi? Dhuna në familje në Mal dhe të gjithë Ballkanin nuk është shumë serioze. Turp për sistemin e drejtësisë malazeze dhe mungesën e llogaridhënies”, shkruan Cunmulaj përmes një story në Instagram.
Shejla Bakija, 19-vjeç nga Tuzi i Malit të Zi është ekzekutuar nga bashkëshorti i saj. Ngjarja ka ndodhur në shtëpinë e babait të viktimës, ku plumbat i kanë marrë jetën edhe gjyshes së saj, ndërsa babai ka mbetur i plagosur. Autori Ilir Gjokaj është ende në arrati.
Ngjarja ka sjellë reagime të shumta në rrjet, ku qytetarët e Malit të Zi kanë bërë thirrje për protesta ditën e sotme në orën 12:00.
“Çohu malësi në këmbë se nuk kemi bija me na u vra. Çohu se sot është e dikujt tjetër, nesër mund të jetë në derën tënde”, është një nga thirrjet për protestë.
Ngjarja tragjike ndodhi dy ditë më parë, ku autori Ilir Gjokaj ka shkuar në banesën e familjes së Sheila Bakijas, duke qëlluar me breshëri arme këdo që i ka dalë përpara.
