Gjykata e Dibrës vendosi masën e sigurisë arrest me burg për 30-vjeçarin Dorjan Dema, i cili akuzohet për vrasjen e 26 vjeçarit, Dritan Manjani. Ky i fundit humbi jetën pas goditjeve me kaçavidë që mori nga autori i krimit, i arrestuar nga policia disa orë pas ngjarjes.
Krimi ndodhi në orët e vona të së hënës në fshatin Homesh në Njësinë Administrative Shupenzë në Bashkinë e Bulqizës.
Gjyqtari i çështjes, Ardit Kuka ka pranuar kërkesën e organit të akuzës duke caktuar e masën e sigurimit personal me karakter shtrëngues “arrest në burg” të parashikuar nga neni 238 i Kodit të Procedurës Penale për Dorjan Demën. Ky i fundit ka treguar dinamikën e ngjarjes sipas versionit të tij, duke u shprehur se kanë patur debate që tek bar kafeja e më pas janë zhvendosur në shtëpi.
Ende nuk ka një version të plotë të rrethanave të ngjarjes së rëndë, teksa mendohet të ketë nisur në një nga lokalet e zonës, përplasje e cila është zhvendosur më pas pranë banesave ku dhe humbi jetën 26 vjeçari Dritan Manjani.
Një ditë më parë, fqinj të viktimës janë shprehur se autori i shoqëruar nga disa persona ka shkuar në banesën e 26-vjeçarit, i cili ishte duke darkuar me familjen e tij. Manjani ka dalë jashtë banese pasi e kanë thirrur, ndërsa është gjetur nën sulmin me mjet prerës, që edhe i mori jetën.
Discussion about this post