Një ngjarje e rëndë ka tronditur Japoninë ditën e sotme, pasi ish-kryeministri i vendit, Shinzo Abe, u qëllua në një fushatë politike dhe si rrjedhojë vdiq në spital.
Abe u qëllua dy herë gjatë një takimi elektoral që po mbante në një prej rrugëve të qytetit të Naras. Ekipi i sigurisë së ish-kryeministrit mundi ta neutralizonte në moment autorin, por Abe nuk mundi dot t’i mbijetonte plagëve të marra.
Autori është 41-vjeçari Tetsuya Yamagami, i cili pranoi se e qëlloi Abe-n me një armë artizanale të krijuar vetë, dhe theksoi se e kreu aktin pasi kishte inat një “organizatë specifike” në të cilën mendonte se ish-kryeministri ishte pjesë.
Disa armë të tjera të punuara me dorë, të ngjashme me ato të përdorura në sulm, u konfiskuan pas një kontrolli në shtëpinë e të dyshuarit, thanë oficerët e policisë në një konferencë për shtyp.
Çfarë dihet rreth të dyshuarit?
Tetsuya Yamagami, 41-vjeçar, është banor i qytetit të Naras. Ai raportohet të jetë një ish-anëtar i Forcave Detare të Vetëmbrojtjes së Japonisë, marinës së vendit, por ministria e mbrojtjes nuk e ka konfirmuar zyrtarisht ende.
Transmetuesi japonez NHK raporton se Yamagami i tha policisë se ishte “i pakënaqur me Abe dhe donte ta vriste”. Dëshmitarët okularë thanë se panë një burrë që mbante atë që ata e përshkruanin si një armë e madhe dhe qëlloi dy herë në drejtim të Abe-s nga pas. Është e paqartë se si sulmuesi mori vesh paraprakisht për pjesëmarrjen e Abe-s në fushatë, pasi vizita u konfirmua vetëm mbrëmë vonë.
Discussion about this post