Vrau të riun për radhën në market, prokuroria e Tiranës mbyll hetimet për ish-policin

Prokuroria e Tiranës përfundoi hetimet dhe dorëzoi në gjykatë dosjen penale ndaj ish-punonjësit të policisë së Dibrës, Arbër Sula, i cili me armën e shërbimit vrau 29-vjecarin Jurgen Duka Mëziri, 20 minuta pas mesnate me 14 dhjetor 2021, pas një sherri në një market për radhën e pagesës.

Ndaj punonjësit të policisë është ngritur akuza e “vrasjes në gjendje të tronditjes së fortë psikike”, ndryshe nga sa u akuzua në krye të herës për “vrasje me dashje”.

Familjarët e viktimës thonë se në këtë mënyrë i afërmi i tyre po vritet për së dyti nga institucionet e drejtësisë, pasi në këtë mënyrë autori brenda pak muajsh del në liri.

Vrasja e 29-vjeçarit

Një ngjarje tragjike ndodhi në kryeqytet orët në orët e para të mëngjesit së 14 dhjetorit. Një efektiv policie ka qëlluar për vdekje 29-vjeçarin J.Duka (Mëziri) në rrugën “Irfan Tomini” në kryeqytet. Vrasja e të riut erdhi pas konfliktit në një supermarket mes tij dhe një efektivi policie. Ky i fundit pas debatit që më pas agravoi në përplasje fizike se kush do të paguante i pari në kasë, ka qëlluar J.Dukën, i cili fillimisht u plagos dhe më pas ndërroi jetë në spitalin e Traumës në Tiranë. Pasi qëlloi ndaj viktimës, efektivi i policisë u largua menjëherë nga vendi i ngjarjes dhe është ende në kërkim. E gjithë skena e vrasjes u filmua nga kamerat e sigurisë së supermarketit. Duka ka qenë i shoqëruar në ato momente nga shoku i tij O.D., i cili dëshmoi në polici se sherri nisi për radhën në kasë. Disa orë pasi ndodhi krimi, policia në një njoftim bëri të ditur se është bërë identifikimi i efektivit që vrau Dukën. Policia thekson se në momentin që ndodhi ngjarja efektivi A.S., punonjës i DVP Dibër, nuk ka qenë në shërbim. Efektivi ka qenë me leje në pritje për të zhvilluar testin e antidrogës. Disa ditë pas vrasjes dyshohej se ish-efektivi e vrau 29-vjeçarin me armën e shërbimit. Fakt që u konfirmua mbrëmjen e 1 marsit me dorëzimin e armës nga ana e A.S. Gjatë kontrollit në trupin e 29-vjeçarit J.Duka u gjet 2.8 gramë lënë narkotike e dyshuar kokainë. Emri i 29-vjeçarit Duka nuk ishte i panjohur për policinë. Viktima ka qenë person me precedentë penalë. Në vitin 2020 ka qenë rasti i fundit kur Duka ka rënë në prangat e policisë, në kuadër të një operacioni antidrogë mes Shqipërisë dhe Italisë. Pas këtij arrestimi Duka u ekstradua në shtetin italian për t’u gjykuar.