Vuante nga sëmundja e rrallë, ndërron jetë foshnja 8-muajshe angleze -

Indi Gregory vdiq, pasi pajisjet që e mbanin në jetë iu fikën. Në qendër të betejës ligjore...

Zemra e vajzës 8-muajshe angleze, e cila vuante nga një sëmundje e rëndë mitokondriale, pushoi së rrahuri në orën 1:45 të mëngjesit të së hënës.

Njoftimi është bërë nga babai i vogëlushes, Dean Gregory.

“Vajza ime vdiq, jeta ime përfundoi në orën 1:45”, tha ai.

“Gruaja ime Claire dhe unë jemi të zemëruar, zemërthyer dhe të turpëruar. Shërbimi shëndetësor dhe gjykatat jo vetëm që ia kanë hequr shansin për të jetuar, por edhe dinjitetin e vdekjes në shtëpinë e saj. Ata kanë arritur të marrin trupin dhe dinjitetin, por nuk do të mund t’ia marrin kurrë shpirtin.”

“E dija që ajo ishte e veçantë që nga dita që lindi, ata u përpoqën ta hiqnin qafe pa e ditur askush, por Claire dhe unë u siguruam që ajo të mbahej mend përgjithmonë”, shtoi familja Gregory në një deklaratë për agjencinë LaPresse .

“Claire e mbajti me vete për frymëmarrjet e fundit”, tha babai i vajzës së vogël në një mesazh dërguar avokatëve të tij, duke folur për momentet e fundit të së bijës pranë nënës së saj. “Ata ia dolën t’ia merrnin trupin dhe dinjitetin Indit, por nuk do t’ia marrin dot kurrë shpirtin. U përpoqën ta heqin qafe Indin pa e ditur askush, por ne u siguruam që ajo të kujtohej përgjithmonë”, nënvizoi babai i Indit.

Më 6 nëntor, qeveria Meloni vendosi t’i jepte nënshtetësinë italiane vajzës së vogël për ta lejuar atë të transferohej në spitalin Bambin Gesù në Romë. Pavarësisht betejës së gjatë ligjore të ndërmarrë nga prindërit, të premten gjykatat britanike kishin urdhëruar ndërprerjen e mjekimeve jetike dhe transferimin në një bujtinë, ku të shtunën u hoqën pajisjet kryesore jetike.

“Ne bëmë gjithçka që mundëm, gjithçka që ishte e mundur. Fatkeqësisht nuk mjaftoi. Udhëtim të sigurt, Indi i vogël.” Ky është komenti në rrjetet sociale nga kryeministrja Giorgia Meloni.

Zëvendëskryeministri Matteo Salvini shkroi në Facebook: “Indi Gregory i vogël nuk është më me ne, një lajm që nuk do të kishim dashur ta lexonim kurrë. Qeveria italiane bëri të pamundurën, duke ofruar ta trajtonte atë në vendin tonë, fatkeqësisht pa sukses. Ne ishim e prekur thellë, lutje për të dhe një përqafim i sinqertë për prindërit e saj.”