Aleksandër Vuçiç ka komentuar deklaratën e presidentes Vjosa Osmani, e cila tha se Serbia është vegël e Rusisë për destabilizimin e Kosovës dhe Ballkanit.
Ai e ka quajtur budallallëk deklaratën e presidentes së Kosovës, Vjosa Osmani, e cila ka thënë se Serbia është vegël e Rusisë për destabilizimin e Kosovës dhe Ballkanit Perëndimor.
“Ne krenohemi me pavarësinë tonë, sovranitetin tonë. Nuk jemi mjet në duart e Rusisë apo dikujt tjetër. As të Amerikës, as BE-së, as dikujt tjetër. Ne jemi vend i pavarur dhe sovran”, tha ai.
Ai pohoi se Serbia është një nga vendet e pakta të pavarura dhe autonome në këtë pjesë të Evropës.
“Në vendin tonë askush përveç nesh nuk vendos se çfarë lëvizje politike dhe ekonomike do të bëjmë dhe unë jam posaçërisht krenar për këtë”, shtoi ndër të tjera.
“Serbia është e pavarur dhe është në rrugën evropiane, por respekton miqtë e saj rusë, kinezë, amerikanë dhe të gjithë të tjerët”.
Vuçiç iu referua deklaratave të cilat vijnë nga Prishtina se Asociacioni i Komunave me shumicë serbe nuk do të formohet, si dhe se Asociacioni nuk mund të ketë kompetenca ekzekutive, sepse kjo do të ishte një “hyrje për krijimin e Republikës Srpska”.
“Më së miri është që Asociacioni të ketë të drejtë të prodhojë qese për krem banane dhe kaq. Eventualisht të prodhohen tri shkrepës në vit dhe të shpërndahen dy stilolapsa për Vitin e Ri, që Vjosa Osmani të jetë e kënaqur”, përfundoi Aleksandër Vuçiç.
Discussion about this post